Vera xespbîyayîşê şaredarî û tayînbîyayîşê qayûman de hêrs û reaksîyonê şarî dewam keno. Sere de Amed, Wan, Mêrdîn, Stenbol, Anqara û sewbîna xeylê cayan de çalakîyî şermezarkerdişî yenî viraştene û xeylê sîyasetmedar, roşnvîr, hunermend û sewbîna destek danî çalakgêran.
Parlamenterê HDPyî yê Amedî Garo Paylanî dîyar kerd ke seba wayîrvejîyayîşê şaredarîyanê HDPyî cesaret bêro ramojnayene, Anqara û Stenbol vînî nêkenê û wina va: “Ewro xelisnayîşê Amed, Wan û Mêrdînî do xeylê kayan veng bivejo. Tirkîya neheqîya girde vîneno labelê reaksîyonî kêmî yî.”
Paylanî qiseykerdişê xo de bale ante hêrişê hukmatî yê vera HDPyî de ser û wina va: “Kampanyaya ke AKP vera hemşaredaranê HDPyî de rayra bena, nêtepişena. Zurê sey ‘koyan rê pere şawenê’ û îftîrayê înan ê bînî zî nêtepişenê. Şarê Tirkîya eşkera vîneno ke neheqîyêka girde bena la vera naye de reaksîyono ke hewce keno, nîno dayene.”
Paylanî qala weçînitişo peyên kerde û wina va: “Weçînitoxî Anqara, Stenbol, Edene, Mersîn û Îzmîr de rixmê heme polîtîkaya dişmenîye ya Erdoganî bîyî yewe û serkewtî. Eke ma nika zî vera Erdoganî de bibî yewe ma ey rê danê vînîkerdene. Erdogan nika hêrişê Amed, Wan û Mêrdînî kerd. Ganî şarê Tirkîya hîna zaf kişta nê hîrê bajaranê ma de vindero. Tayî embazê ma yê CHPyijî tewirê xo ramojnenê. No tewirêko erjaye yo. CHP ganî sey dezgehkî zî nê tewirî ramojno. Eke ma nê cesaretî nika ramojnê, ma Stenbol û Anqara vînî nêkenê. Ewro xelisnayişê Amed, Wan û Mêrdînî do xeylê cayan nêdo vînîkerdene. Ganî ma pêro pîya vera na neheqîye de bivinderî. Ganî her kes berpisîyarîya xo bica bîyaro.”
ANF / AMED