SEDAT SUR / ANF / MÊRDÎN
Nisêbîn de hêzê dewlete bi aşman hêrişê taxanê Zeynelabîdîn, Kişla, Abdulkadîrpaşa, Firat, Dîcle û Yenîşehîrî kerd û bi tanq û topan zafaneyê awanîyanê nê taxan xira kerd. Nika zî nê taxan de awanîyê ke bi hawayo saxlem mendî, hetê dewlete ra yenî rijnayîş, mal û milkê şarî zî yeno talankerdiş.
Babete ser o Verfeka Însîyatîfê Dayîkê Aştîye ya Nisêbînî Perîhan Altoge qisey kerde.
Altoge va ‘wehşeto ke dewleta tirk Nisêbîn de kerd, zerrîya merdimî dejneno’ û qiseykerdişê xo wina domnaye: “Giranîya nê wehşetî ver êdî merdim nêşkeno sebir bikero; dewleta tirk ke hêrişê cenazeyan kerdêne û destûr nêdayêne tazîyeyan, nika zî keyeyan rijnena û talan kena. Şarê Nisêbînî êdî nêşkeno nê wehşetî qebul bikero û ma do qebul nêkerî zî. Dewlete do hesabê nê wehşetî bido û şarê Nisêbînî do kesê ke nê wehşetî kerdî, înan efû nêkero.”
Şar wazeno biagêro
Altoge dewamê qiseykerdişê xo de dîyar kerde ke şarê Nisêbînî wazeno biagêro keyeyanê xo û keyeyanê dewlete nêwazeno û wina va: “Nisêbînijî awanîyê ke hetê TOKÎ ra do bêrî viraştiş, nêwazenî. Şarê Nisêbînî qet keye çinêbo zî, do erdê xo ser de mîyanê çadiran de bicuyî. Wa veradî ma erdê xo ser de bicûyî û wa wehşetê dewlete biqedîyo.”
Wa bivinderî
Altoge peynîya qiseykerdişê xo de seba vindarnayîşê rijnayîşî veng da raya pêroyî û qiseykerdişê xo wina qedênaye: “No wehşet o, suc o û gune yo. Ganî şarê kurd vera nê wehşetî de têkoşîn bido û seba vindarnayîşê nê zulmî ganî her kes biwerzîyo lingan ser. Rijnayîşî ver lazimîya merdimîye hîna zêde bîyo. Cok ra ganî seba şarê Nisêbînî piştîdayîşêyewbînan bêro girdkerdiş.”