Rayberê Şarê Kurdî Abdullah Ocalanî bi mabênkarîya birayê xo vato ‘ma prosesêko xitimîyaye ra derbaz benî’ wina domnayo: “Grev metodêk o, labelê heta cayêk netîce gêno. No merhale ra dima ganî çalakîyê demokratîkî bikewî dewre. Ganî hem dewlete û hem zî PKK metodanê neweyan bivînî.”

ERDOGAN ALAYUMAT / MA / RIHA

Bi wesîleya Roşanê Remezanî keyeyê Rayberê Şarê Kurdî Abdullah Ocalanî ra Mehmet Ocalan û keyeyê hepsîyanê ke Îmrali de yî Hamîlî Yildirim, Veysî Aktaş û Omer Hayrî Konarî şîyî pêvînayîşî.

Birayê Ocalanî derheqê muhtewaya pêvînayîşî de qisey kerd û dîyar kerd ke înan averşîyayîşê ke Rojhelato Mîyanên de yenî cuyayene ra heta rewşa peyêne ya Şengalî xeylê çîyan ser o qisey kerdo.

Mehmet Ocalanî da zanayene ke o 20 serrî yo ke şono Girawa Îmrali yeno, labelê heta nika sehnayîşêko winasî qet nêdîyo û wina va: “Çîyê winasî cayêko bîn de çin o. Ez zaf eciz bîya. Ma tewr tay 5 cayan de ameyî sehnayene. Înan ewja de ma kerdî di beş, ma cayanê cîya-cîyayan de pêvînayîş viraşt.”

Ma heyfê şengalijan girewt

Mehmet Ocalanî va ‘ma pêvînayîş de giranî ser grevê vêşanîye û rewşa peyêne ya Şengal û Vakurê Sûrîye ser o qisey kerd’ û dîyar kerd ke o Rayberê Şarê Kurdî ra vato ‘şarê Şengalî to û Tevgerê Şarê Kurdî ra zaf hes keno’ û vatişê ci ard ziwan: “Raşt o, ez înan ra zaf hes kena. Merdim eşkeno seba azadîya Şengalî qala 2 hedîseyan bikero; yew Dewrêşê Evdî, ya dîyine zî têkoşînê embazanê ma yo. Şarê Şengalî Şengal ra heta Reqqa raştê qetlîyamî ame. Labelê hêzanê ma vernîya qetlîyamî girewt. Ma heyfê şengalijan girewt. Cok ra ma kêfweş î. Ez silam û hurmetê xo şengalijan rê erşawena. Wa cuya xo ya azade awan bikerî.”

Ganî çalakîyê demokratîkî bikewî dewre

Mehmet Ocalanî qiseykerdişê xo de qala grevê vêşanîya kerde û fikrê Ocalanî pare kerd: “Grevê vêşanîye metodêk o, labelê heta cayêk beno. Dima ra beno ke zirar bido. No merhale ra dima ganî çalakîyê demokratîkî bikewî dewre. Ma donemêko xitimîyaye ra derbaz benî û no donem de polîtîkayê şer û îmhayî netîce nêgênî. Ganî hem dewlete û hem zî PKK seba çareserîye metodanê neweyan bivînî.”

Keyeyan rê serweşîye waşte

Mehmet Ocalanî va ‘Ocalanî seba kesê ke seba protestokerdişê tecrîdî xo feda kerdî xemgîn bi’ û wina dewam kerd: “Nê mergî hem zirar da mi û hem zî keyeyanê înan. 8 embazan canê xo feda kerd. Hem Ewropa, hem Tirkîya û hem zî Başûrê Kurdîstanî de grevê vêşanîye bîyî. Ê ke zîndan de yî, xora şertê înan baş nîyî. Nêşênî sîyaset bikerî. Labelê yê ke teber de yî, îmkanê înan zêde yo. Wa reaksîyonê xo yê demokratîkan nîşan bidî. Eke îmkanî bêrî awankerdene, ma eşkenî nê xitimîyayîşî derbaz bikerî. Bi şer û mergan reyde no problem çareser nêbeno.”

Ganî ma vinderî û bivînî

Mehmet Ocalanî dîyar kerd ke ey birayê xo ra persê ‘gelo nika ra pey do pêvînayîşî dewam bikerî an nê?’ kerdo û vatişê birayê xo ard ziwan: “Ez ne eşkena vaja ke temamî vernîya pêvînayîşan abîyo û ne zî eşkena vaja ke padîyayo. Ganî merdim tay bivindero. Eke nê qenalî bi temamî abî, no seba herkesî baş o, labelê eke bêrî padayene, o wext do rijnayîş xo reyde bîyaro.”

Mehmet Ocalanî tewr peynî da zanayene ke înan qiseykerdişê xo de qet qala weçînayîşanê Stenbolî nêkerda û Ocalanî Roşanê Remezanî yê herkesî pîroz kerdo.