Hemvervatoxê HDKyî yo verên Onûr Hamzaoglûyî sebebê tayînbîyayîşê qayûman sey ‘Sûrîye’, ‘Bêûsulîye’ û ‘Muxalefet’ rêz kerdî û wina va. “Qayûmî tena mudaxaleyê vera Kurdan de nîyo. Îqtîdar eşkeno dest ser no şaredarîyanê bînan zî. Cok ra ganî vera nêyî de xeta têkoşînêko hempar bêro awankerdene.”
FERHAT ÇELÎK / MA / STENBOL
19ê Tebaxe de îqtîdarê AKP û MHPyî şaredarîyê bajarê girdî yê Amed, Wan û Mêrdînî xesp kerdî û herinda hemşaredaran de qayûmî tayîn kerdî. Vera nê xespkerdişan de her hetî ra reaksîyonî yenî.
Hemvervatoxê Kongreya Demokratîke ya Şaran yo verên Onur Hamzaoglûyî qisey kerd û vera xespbîyayîşê îradeya şarî de hêrsê xo nîşan da. Hamzaogluyî dîyar kerd ke ganî hêvîya ke 31ê Adare û 23ê Hezîrane de vejîyaye werte, bêra girdkerdene.
Hamzaoglûyî da zanayene ke sebebo esasî yê qayûman averşîyayîşê ke Sûrîye de qewimîyenî yî û wina va: “Wexto ke merdim çîyê ke Tirkîya de benî ra ewnîyeno, vîneno ke AKP êdî bîyo parçe û zaf tengî de yo. Seba tayînkerdişê qayûman ti sebeb çinêbi. Averşîyayîşê ke Sûrîye de benî, bîyî sebeb ke qayûman tayîn bikero. Tirkîya çîyê ke 2011 de ewja de qewimîyayî kerd firsend, bi hawayo dagîrker hewl da bikewo ewja. Seba ke bikewo ewja, bextwaştoxî bi kar ardî, labelê heta nika nêresaye hedefê xo. AKP tîya de seba ke rojevêka bîne awan bikero, qayûmî tayîn kerdî. No sebebo sifteyîn o.”
Îqtîdarî waşt çimê muxalîfan bitersno
Hamzaoglûyî qiseykerdişê xo de qala sebebê dîyine zî kerde û wina va: “Sebebo dîyin zî bêûsulîyê ke hetê qayûmanê verênan ra ameybî kerdene yî. HDPyî weçînayîş ra dima xebatêka başe kerde û netîceyê xebatan de dîyar kerd ke ê do heme bêûsulîyanê qayûmanê verênan eşkera bikerê. Sebebo hîrêyin zî îqtîdarî waşt çimê muxalîfan bitersno. Îqtîdarî waşt mesaj bido cayê sey Anqara, Antalya û sewbîna ke vînî kerdbî zî. Seba ke muxalîfî nêresî pê, nika qayûman tayînê şaredarîyanê CHPyî nêkeno. Îqtîdar eşkeno dest xeylê şaredarîyanê bînan zî ser no. Raştîya xo de bajaranê Kurdan ra ver qayûm tayînê Stenbolî bi. Ganî xeta têkoşînî bêro rêxistinkerdene.”
Ganî HDP baş weçînitoxan rê îzeh bikero
Hamzaoglûyî dewamê qiseykerdişê xo de qala çîyê ke HDP bikero zî kerde û wina va: “Ganî HDP bi hawayo baş nê qayûman îzehê weçînitoxanê xo bikero. Ganî bêûsulîyê ke ameybî kerdene, raya pêroyî rê bêrî eşkerakerdene. Çîyê ke hetê qayûmanê bînan ra amebî kerdene, ganî heme şaredarîyan reyde bêrî parekerdene. 3 hemşaredarê ke qayûmî herinda înan de ameyî tayînkerdene, ganî na mesela bikirêşî rojeva mîyanneteweyî. Yeno dîyayene ke nika tehdîdî dest pêkerdî. No zî nîşan dano ke ê rayîro raşt de yî.”
Pîya hereket kerdene lazim o
Hamzaoglûyî peynîya qiseykerdişê xo de wina va: “Îqtîdarî prosesêko ke Ocalanî vatbi ‘ez seba çareserîye amade ya’ de nîşan da ke o çareserîye nêwazeno. Tîya de wezîfeyêko gird keweno milê hêzanê demokrasî ser. Ganî Amed, Mêrdîn, Wan, Stenbol, Anqara û Îzmîr de pîya têbigêrî. Çimkî eke Stenbol de şaredarîye girîyaya, no tena saya Îttîfaqê Milletî de nîyo. Ê zî baş zanî ke wina yo. Coka ganî ma şaşîyanê wextanê verênan ronî hetêk de û pîya hereket bikerî. Ganî hêvîya 31ê Adare û 23ê Hezîrane bêro girdkerdene.”