Çend rojî verê Serekwezîrê dewleta tirk Bînalî Yildirim Herêma Başûrê Kurdistanî zîyaret kerdbî û ewja de hetê Serekê PDKyî Mesut Barzanîyî de vatbî ‘PKK û PYD terorîst î’. Vera nê vatişê Yildirimî û duştê nê vatişan de bêvengmendişê Mesut Barzanîyî de her ke şono reaksîyonî zêde benî.Babete ser o Parlamenterê YNKyî Mihemed Osman û nuştox Rêkeft Îsmaîlî qisey kerdî.Osmanî va ‘ganî dewleta tirk fek heqeretkerdişê dewleta tirkî ra verabido û kurdan reyde pîya bicuyo’ û wina domna: “Qiseykerdişo ke Yildirimî Hewlêr de kerd, çîyêk rê xizmet nêkeno. Eke ma nê herême de kurd, ereb, tirk û farisî pîya cuyenî, o wext ganî ma yewbînan ra rêze bigirî. Nê şarî heme zî seba ke bişînbî qederê xo tayîn bikerî, têkoşîn danî. Ma do îzehetê ke PKK û PYDyî terorîst nîşan danî, qebul nêkerî.”
Ez zî terorîst a
Osmanî dewamê qiseykerdişê xo de reaksîyon nîşanê vera vatişanê Bînalî Yildirimî de bêvengmendişê Barzanîyî da û wina va: “Mesut Barzanî serekê Herêma Kurdistanî nîyo, serekê PDKyî yo. Cok ra ganî PDK bêvengmendişê Barzanîyî îzeh bikero. Eke îzeh nêkerî zî ganî bizanî ke vindetişêko ewja de ame nîşandayîş, qet baş nêbî; çimkî PKK û PYD partîyê ke xeylê şehîdê înan estî yî. Nê partîyî Xaneqîn ra heta Kobanê pawitî û xeylê şehîdê înan estî. Wexto ke gerîlayê PKKyî Mexmur pawitênê, Mesut Barzanîyî înan zîyaret kerdbî û sipasîya xo înan rê kerdbî. Mi verê cû vatbî ke ‘eke PKK terorîst o, o wext ez zî terorîst a’ ez nika nê vatişê xo dibare kena.”
Ganî Tirkî bivejyî
Osmanî dewamê qiseykerdişê xo de bale ant munaqeşeyê ke Şengal ra vejîyayîşê PKKyî ser o yenî kerdiş û wina va: “Nika hewl yeno dayîş ke PKK Şengal ra bêro vetiş. No çîyêko munasîb nîyo; çimkî wexto ke Şengal û Başûrê Kurdistanî ser de hêrişî virazîyayî, PKKyî pêşmergeyan reyde ê cayan pawit. PKK nê, ganî dewleta tirk hêzanê xo Başûrê Kurdistanî ra bivejo. Problemê Şengalî, problemê mîyanên yê kurdan o, o zî bi dîyalog eşkîyeno bêro çareserkerdiş. Ganî heme hêzê leşkerî yê kurdan bibî yewe.”
ANF / KERKUK