Dîyaneto ke bi serran o bawerîya îslamî elewîyan ser o dano ferz kerdene, çend rojî verê Serekê Karê Dîyanetî Alî Erbaşî Dêrsim zîyaret kerd. Reya sifteyîne ya ke Erbaşî Cemxane û Komela Hetkarîye û Vilakerdişê Kulturê Haci Bektaşi Velîyî zîyaret kerd. Wextê zîyaretî de Serekê komele Alî Ekber Yurt û pîranê cemxaneyî seba ke cemxaneyî bibî wayîrê statuyê qanûnî, waştişê pêşkêşê Erbaşî kerd.
Babete ser o dêrsimijî qisey kerdî. Dêrsimijan vera vatişanê Erbaşî de reaksîyon nîşan da û wina va: “Ma na rewşe qet baş nêvînenî. Çi heyf o ke nê kesî bîyî pîr. Ma tîya de pîrê ke goreyê Serekê Karê Dîyanetî hereket kenî, baş nêvînenî. Bi serran o tîya de cemxane esto û heta nika Serekê Karê Dîyanetî nêameyo, çira emser yeno? Dîyar o ke tîya de planêk esto.”
Dêrsimijan vera pasaportan erşawîyayîşê pîran yê teberê welatî de reaksîyon nîşan da û wina va: “Eke Serekê Karê Dîyanetî yeno tîya û pîranê ma erşaweno teberê welatî, no çîyêko baş nîyo. Tîya de tesilî menfîetêk esto. Yê ke şonî pîr nîyî û seba pereyî şonî. Yê ke şonî destek danî dîyanet, cok ra şonî. Ê seba ke pereyî ra hes kenî, cok ra şonî. Cemxaneyanê ma nêşinasnenî. Ma nê şertan de qebulkerdişê pîran zî baş nêvînenî. Çi karê pîranê ma bi Serekê Karê Dîyanetî reyde esto? Ti pîr î, rayîrê to cîya yo, rayîrê Dîyanetî cîya yo.”
PÎRHA / DÊRSIM