ZEYNEP KURAY / ANF/ STENBOL
Rayberê Şarê Kurd Abdullah Ocalan 18 serrî ra zêdeyêr o ke Girawa Îmrali de binê tecrîdêko giran de cuyeno. Ocalan 2011 ra nata avûkatanê xo reyde nêşêno pêvînayîşan bikero. Reyna 2016î ra nata zî nêşêno Heyetê Îmrali reyde pêvînayîş bikero. Seke yeno zanayîş çend hewteyî verê zî medyaya komelkî ser o tayê xeberî ameybî parekerdiş. Xeberê ke medyaya komelkî ser ro ameyî parekerdiş de ameyêne vatiş ke Ocalan merdo.
Parekerdişê xeberan ra nata kurdî û dostê kurdan payan ser de yî. Bitaybetî bajarê Ewropa û Kurdistanî de xeylê cayan de kurd û dostê kurdan seba ewleyî û weşîya Ocalanî çalakîyan virazenî û hêrs û nefretê xo vera hêzê ke tecrîdî meşnenî û yê ke bêveng manenî de nawnenî. Babete ser o birayê Ocalanî Mehmet Ocalanî qisey kerd.
Mehmet Ocalanî va ‘badê ke medyaya komelkî ser de xeberî ameyî parekerdiş, etirîyayîşê keyeyî hîna zêde bîyo’ û wina dewam kerd: “Her hewte keye û avûkatî seba pêvînayîşî muracat kenî, labelê cewab nêdîyeno ma. Na rewşe nîna qebulkerdiş. Astengkerdişê keye û avûkatan teberê huqûqî de yo. Na bêhuqûqîyêka girde ya.”
Ocalan nînan dîbî
Ocalanî dewamê qiseykerdişê xo de wina va: “Domnayîşê tecrîdî tena keye rê nê, şar û dewlete rê zî beno problem. Tewr peynî 11ê êlula 2016î de ma pêvînayîş kerdbî û o wext weşîya ci baş bîye labelê bihêrs û etirîyaye bî. Xora o wext de zî dîyar kerdêne ke do xitimîyayîşêk bibo. Polîtîkaya tecrîdî feyde nêdana ti kesî. Heta ke tecrid bidomîy, do problemê kurd çareser nêbo. Tecrîd bîyayîşanê Rojhelato Mîyanên ra qerfîyaye nîyo. Birêz Ocalan mîyanê şaran de pirdê aştîye yo. Heqê ti kesî çin o ke nê pirdî birijno. Wa dewlete û hukmat fek bêhuqûqîye ra verabido. Eke pêvînayîş bibo, no seba Tirkîya zî feydeyin o. Wa rayîrê Îmrali bêro akerdiş.”