Ganî sîstemê Başûrî bibedilîyo

Muneqaşayê referandûmî her ke şono hîna kûr beno. Başûrê Kurdistanî de zî amadekerdişê referandûmî yeno kerdiş. Babete ser o Parlementerê Başûrê Kurdistanî yê Yewîya Welatî Salar Mehmûdî qala rewşa peyêne ya Kerkûkî kerd û muneqaşayê polîtkayan ser o qisey kerd. 

Salarî destpêka qiseykerdişê xo de va ‘ganî sîstemê îdarekerdişî yê herêma Başûrê Kurdistanî kokî ra bêro bedilnayîş’ û wina dewam kerd: “Başûrê Kurdistanî de şaşîyê cidî yenê kerdiş. Ganî ma problemanê zerre, aborî, sîyasî û qanûnan çareser bikerî. Sebebê heme probleman deshilatîyê PDKyî yo. Ganî problemê partîyan bêrî çareserkerdiş, meclîs bêro aktîfkerdiş û demokrasî bêro awankerdiş. Şarê kurdî seba heqê azadî û xoserî têkoşîn dano. Hedefê serewedarnayîşê Şêx Seîdî awankerdişê dewleta kurd bî. Bi hezaran kesî rayîrê Şêx Seîdî de têkoşîn dayî û şehîd bîyî.”

Ti heqê tirkîya çin a

Salarî dewamê qiseykerdişê xo de zî va ‘bajarê Kerkûkî de wedarnayîşê beyraqa Kurdistanî nîşaneyê xoserîyêk tarîxî yo’ û wina qedêna: “Goreyê mi daleqnayîşê beyraqe qerarêko munasîb o û goreyê desturê Îraqî nîno wedarnayîş. Ti heqê Tirkîya çin a ke eleqeyê karê zereyî yê Îraq û Başûrê Kurdistanî bikera. Heqê xoserî yê heme şaran esto.”