DÎLAN BABAT / HÎKMET TUNÇ / JINNEWS / WAN
5ê Nîsana 2011î ra nata bi mehneyê ‘muxalefetê hewayî’ û ‘keştî xirabe ya’ Rayberê Şarê Kurdî Abdullah Ocalanî reyde pêvînayîşî yenî astengkerdiş. Badê ke Konseyê Caardişî yê KCKyî 3 rojî verê derheqê weşî û ewleyîya Ocalanî de îzehetêkî da, heme dinya de kurdî vejîyayî raşteyan û tecrîdî protesto kenî.
Tirkîya de zî Tevgerê Cinîyanê Azadan (TJA) bi kampanyaya ‘Tecrîd do vînî bikero, azadî do qezenç biekera’ xebatê taxe û ziqaqan dewam keno. Babete ser o Parlamentera HDPyî ya Stenbolî û Endama Heyetê Îmrali Pervîn Buldane qisey kerde. Buldane dîyar kerde ke ê proseso ke tewr zaf lazimî bi fikre Ocalanî esto de cuyenî û ganî cinîyê wayîrê Rayberê xo bivejyî.
Buldane dewamê qiseykerdişê xo de va ‘wedarnayîşê tecrîdî seba şaranê Tirkîya do feydeyin bo’ û wina dewam kerde: “Wedarnayîşê tecrîdî de wezîfeyêko gird keweno cinîyan rê. Wedarnayîşê tecrîdî seba çareserîya problemê kurd û demokratîkbîyayîşê Tirkîya zaf muhîm o. Ewro tay bo zî tayê reaksîyonî estî, labelê nê reaksîyonî qîm nêkenî. Birêz Ocalanî wextê muzakere û aştîye de tewr zaf cinîyan ardêne rojeve, nika zî ganî tewr zaf cinîyî têkoşîn bidî.”
Ancax Ocalan eşkeno biqedêno
Buldane wina va: “Herkes zano ke vengdayîşêkî Ocalanî daxî krîzî do çareser bikero. Ma wextê grevê vêşanî û pêrodayîşan de dî. Birez Ocalan tena seba kurdan nê, seba heme Tirkîya û Rojhelato Mîyanên şexsîyetêko muhîm o. Cok ra dewlete û hukmat hewl danî fikrê ey nêresî şarî. Ganî şarê kurd esla tecrîdî qebul nêkero. Ganî ma hêrsê xo nîşan bidî ke wa tecrîd biwedarîyo û prosesê aştî û muzakere reyna bikewo dewre. Eke heqîqeten demokratîkbîyayîşê Tirkîya yeno waştiş, o wext ganî selahîyetdarî newe ra Birêz Ocalanî reyde pêvînayîşan bidî destpêkerdiş. Çimkî bingeyê krîzî de tecrîd esto.”