Hemserekê Konseyê Caardene yê KCKyî Cemîl Bayikî derheqê xoverdayîşanê grevê vêşanîye de ercnayîşî kerdî û ard ziwan ke ê do teqîb bikero tecrîd do dewam bikero yan nê. Bayikî va ‘ganî xoverdayîş û tîfaq bi hawayêkê xurtî dewam bikero’.

MEDYA HAWAR / ANF / BEHDÎNAN 

Hemserekê Konseyê Caardene yê KCKyî Cemîl Bayikî derheqê pêvînayîşê Îmrali, xoverdayîşê grevê vêşanîye, mesajê Rayberê Şarê Kurdî Abdullah Ocalanî de mesajê muhîmî dayî. Bayikî cewabî dayî persanê rojnameger Enes Yildizî yê derheqê sîyasetê Îraq û Başûrê Kurdistanî û krîzê mabênê Îran û Amerîka de.

Bayikî va ‘ez bawer kena ke Leyla Guvene, tepişteyê ke zîndanan de yê û xoverdayoxê ke teber de yê, ça benê wa bibê do waştişê Rayber Apoyî bica bîyarê’ û wina dewam kerd: “Bi na wesîle ez hema çalakwanan silam kena, çalakîya înan pîroz kena. Hem mîyanê şarê Kurdî de û hem zî wareyê mîyanneteweyîyî de xeylî nuştox, roşnvîr, sîyasetmedar û pawitoxanê heqanê merdiman paştî daye na çalakî, heta tayênan zereyê xoverdayîşî de ca girewt. Her çiqas ke çalakî biqedîyo zî Kurd, dostê Kurdan û şarê Tirkîya do teqîb bikerê ka tecrîd qedîyayo yan nê. Ganî Tirkîya qanûnanê xo binpay nêkero. CPT zî mecbûr mende ke şiro Îmrali û zîndananê bînan. Ganî no qedexe bi hawayêkê fîîlîyî zî bêro qedînayene.”

Bayikî bale ant zîhnîyeto ke Tirkîya de esto ser û wina va: “Rayber Apoyî û Tevgerê ma xeylî reyan adirbest îlan kerd. Çira? Çimkî Rayber Apo wazeno ke Tirkîya de demokrasî aver şiro, problemê sîyasî, ekonomîk û cimatkî yê Tirkîya hal bibê. Eke demokrasî aver nêşiro Tirkîya rê azadî nêna, problemî zî hal nêbenê. Tam eksê ci do problemî hîna bibê giran. Tirkîya de problemê sîyasî, cimatkî û ekonomîkî girêdayeyê şerê Kurdan ê. Eke zihnîyet nêvurîyo Tirkîya de çi rey şer nêqedêno.”

Têkilîya pêvînayîşan bi weçînayîşî çin a

Bayikî qala muhtewaya pêvînayîşan kerde û wina va: “Nê pêvînayîşê ke virazîyayî têkilîya înan bi weçînayîşî çina. Tayê vanê na hemleyêk a, nê rastî nêyê. HDP partîyêka Tirkîya ya ke demokrasî pawena. Tayê kemasîyê ci estê û seba halkerdişê nînan xebate kena. Weçînayîşan de zî stratejîyêka demokratîke aver berde û na stratejî netîce girewte. Erdogan nêwazeno Stenbol bikewo destê hêzanê demokratîkan. Reyna wazenê şaredarîyanê Kurdistanî bigîrê kontrolê xo. Nika ra xebatanê xo kenê. Vernîya tayê şaredarîyan de cîhazî ronayê. Her ca de polîs û leşkeran bica kerdê. Ê do nê sîyasetê qayûmî bidomnê. Ganî bi çalakîyanê cimatkîyan vera nê sîyasetî de veng bêro vetene.”

Tirkîyaye şer da destpêkerdene

Bayikî va ‘Kurdanê Vakurê Sûrîye çi rey hêrişê Tirkîya nêkerdo, Tirkîya hemverê înan de şer da destpêkerdene’ û wina dewam kerd: “Tirkîya Efrîn îşxal kerd, wazena ke awanîya ûcayî bivurno. Yanî heto ke hemverê Sûrîye û şarê Kurdî de şer keno Tirkîya ya. Ganî Tirkîya fek nê sîyasetê xo ra verado, Efrînî ra vejîyo û îşxalî biqedîno. Eke Tirkîya nînan bikero do problemê Sûrîye hîna asan hal bibê.”

Eke kongre virazîyo, problemî çareser benî

Bayikî qiseykerdişê xo de qala rewşa Başûrî zî kerde û wina va: “Nika Iraq û Başûrê Kurdistanî prosesêkê zehmetinî ra ravêrenê. Sebebê ci zî ambargoyê Amerîka yê serê Îranî yo. Amerîka wazena ke her kes paştî bido nê ambargoyî û zextê serê Îranî zêde bibê. Tirkîya û Iraq, Iraq û Başûrê Kurdistanî zî seba halkerdişê nê problemî pêvînayîşan kenê. Başûr zî gama ke beno zihîf yan zî tewirêkê biperçeyî ramojneno keweno tesîrê dewletanê teberî. Ganî nê bêrê dîyene. Xusûsen eke Başûr de kongreyêka neteweyîye virazîyo do problemî bieşkê hal bibê.”