4ê Gulana 1937î de hetê Heyetê Wezîran ra qerarêko fermî ameyo girewtene û dima ra goreyê ê qerarî Dêrsim de bi sehezaran merdimî ameyî qirkerdene. Merkezê Cigêrayîşanê Dêrsimî ra nuştox Nesîmî Adayî babete ser o qisey kerd.
Adayî va ‘seba famkerdişê Qirkerdişê Dêrsimî ganî merdim Koçgirî û Agirî bîyaro xo vîr’ û wina va: “4ê Gulane de bi qerarê Heyetê Wezîran qerarê qirkerdişî ameyo girewtene. 15ê Teşrîna verêne de Seyîd Riza û embazê ci ameyî îdamkerdene. 1935 de dewlete seba bajarêkî qanûnêk vetbi; qanûnê qirkerdişî. Belgeyê 4ê Gulane îspatê ci yo.”
Adayî dewamê qiseykerdişê xo de qala melumatêkê neweyî kerd û wina va: “Verê cû xeylê reyan amebi vatene ke Dêrsim de gazo jehrin amebi bikarardene. Labelê ma nêzanayêne ke o gaz Almanya ra yan zî Îngilistan ra amebi girewtene. Nika zelal bi ke gaz Almanya ra ameyo girewtene. Temmuza 1937î de 20 ton gazê klorî ameyo girewtene. Ma belgeye ci dî. No belge de heme çî nusîyeno.”
3 cayan de vîrardişî do bêrî viraştene
Adayî peynîya qiseykerdişê xo de wina va: “Dêrsim de bi hawayo organîze qirkerdişêk ameyo viraştene. Ganî no qirkerdiş reyde têrî bimanîyo. Verê cû wexto ke Erdogan serekwezîr bi, ozrê xo waştbi. Labelê dima ra çîyêko bîn nêbi. Derheqê qirkerdişî de 150 hezar belgeyî estî. Aqûbetê nê belgeyan nîno zanayene. Eke bizanîyo, ma do cayê Seyîd Riza û embazanê ci ke ameyî definkerdene zî bizanî. Emser do Stenbol, Dêrsim û Amed de vîrardişî bêrî viraştene. Amed de reya sifteyîne do bêro viraştene. Ma zî do destek bidî nê vîrardişan.”
PÎRHA / STENBOL