Bi wesîleya 1’ê Îlonê Roja Aştiyê ya Cîhanê Komîteya Amadekar a Kongreya Neteweyî ya Kurd peyameke hevpar da.  Komîteyê di peyamê xwe de destnîşan kir ku her çiqas çareserkirina pirsgirêka Kurd bi riya demokratîk bo Kurdan baş be jî her wiha dê pêşiya demokratîkbûnê ya gelên herêmê jî vebike û wiha hat gotin: “Jî bo çareserkirina pirsgirêkan, gelê Kurd û têkoşîna wî xwedî ciheke girîng e.”
Komîteyê destnîşan kir ku pêvajoya Çareseriya Rizgariya Demokratîk a di 21’ê Adarê de ji aliyê Rêberê Gelê Kurd Abdullah Ocalan ve hat destpêkirin, qonaxa xwe ya yekemîn temam kiriye û wiha pêde çû: “Pêvajoya Çareseriya Rizgariya Demokratîk a ji aliyê Rêberê Gelê Kurd Abdullah Ocalan ve hatiye destpêkirin, ji gelê Kurdistanê, hêzên herêmî û navneteweyî û raya giştî ya demokratîk ve bi pêwendiyeke mezin tê destekirin. Ji ber ku pêkhatina aştiyê ya li Tirkiyeyê, di serî de li Rojhilata Navîn dê xizmetê ji aştiya gerdûnê ya navneteweyî re bike. Bi vê bîr û baweriyê, di serî de başûrê Kurdistanê tevahiya gelê me yê li her çar parçeyên Kurdistanê û derveyî welat, ji bo serxistina vê pêvajoyê bûye yek deng û yek dil. Pêvajoya Çareseriya Rizgariya Demokratîk a giyana yekitiyê ya navbera Kurdan xurt kir, di heman demê de ji bo lidarketina kongreya yekitiya neteweyî ya dîrokî, bingeheke bi hêz afirandiye.”
 

Şert û mercên Ocalan 


Di peyama ku ji aliyê komîteyê ve hat dayîn de bang li hikûmeta AKP’ê jî hat kirin ku pêwîstiyên qonaxa duyemîn bi cih bîne û wiha hat gotin: “Wekî Komîteya Amadekar a Kongreya Neteweyî ya Kurd ku bi perspektîfa demokratîkbûyîn, yekitî û aştiyê xebatên xwe dimeşîne, em di wê baweriyê de ne ku divê êdî qonaxa duyemîn a pêvajoyê dest pê bike. Tevgera Azadiya Kurd ji bo pêkhatina qonaxa yekemîn berpirsyariyên xwe bi cih anî, gerîla vekişand derveyî sînor, bi vî rengî rê li ber agirbestê vekir û bendewariya her kesî ye ku êdî pêvajo derbasî qonaxeke nû bibe. Em li bendê ne ku hikûmeta AKP’ê, bi bicihanîna berpirsyariyên xwe re qonaxa duyemîn a pêvajoyê bide destpêkirin û ji bo Rêberê Gelê Kurd  li gorî giyan û karektera pêvajoyê rola xwe bilîze, şert û mercên ew lê tê ragirtin, werin başkirin.”
 

Em li cem gelê xwe ne 


Komîteya Amadekar êrîşên li dijî gelê rojavayê Kurdistanê jî şermerzar kir û peyam wiha berdewam kir: “Gelê me yê Rojava ku her tim jiyaneke yekitî, aştî û demokratîk a bi gelan re ji xwe re esas girtiye, di mehên dawî de rastî êrîşên dijwar tê. Wekî Komîteya Amadekar a Kongreya Neteweyî ya Kurd em van êrîşan şermezar dikin û diyar dikin ku di her şert û mercî de em li cem gelê xwe ne.” Di peyamê de herî dawî bal hat kişandin ser pevçûnên li Rojava û gelemperiya Rojhilata Navîn û peyam bi van hevokan bi dawî bû: “Em hêvîdar in û dixwazin, 1’ê Îlonê Roja Aştiyê ya Cîhanê ji aştiya gelên Kurdistanê re şahidiyê bike û bibe wesîle ji aştiya li Rojhilata Navîn re. Bi vê bîr û baweriyê, 1’ê Îlonê Roja Aştiyê ya Cîhanê, li tevahiya gelên bi giyana aştiyê pîroz be.”


DÎHA/HEWLÊR