Hemsereka Pêroyî ya HDPyî ya kehene Fîgen Yuksekdage vejîyaye mehkeme û pawitişê xo kerde. Yuksekdage daye zanayene ke Tirkîya de rezaleto sîyasî ame cuyayene û wina dewam kerd: “Tewqîfbîyayîşêk qîm nêkerd, 2 reyî tewqîf kerdî. Gelo nêyî ver fikrê mi, estene û muhîmîya HDPyî bedilîyena? Wa 22 reyî tewqîf bikerî, gelo heqîqete bedilîyena?”
Hemsereka Pêroyî ya HDPyî ya kehene Fîgen Yuksekdaga ke tewqîfbîyaye ya, derheqê aye de çarçewaya dosyaya ke 7 fezlekeyî pê resnîyayî de vizêr mehkemeya aye ameye dîyayene. Hemserekê Pêroyî yê HDPyî Sezaî Temellî, Hemserekê ESPyî Şahîn Tumuklu û Ozlem Gumuştaş zî tede xeylê kesî beşdarê mehkeme bîyî.
Seba ke beşdarbîyayîş xeylê zêde bi, serekê mehkeme emir da û waşt ke wa tena 80 kesî beşdarê mehkeme bibî. No semed ra mabênê avûkat û serekê mehkeme de munaqeşe vejîya. Yuksekdage pawitişê xo de ewil seba kesê ke erdlerzê Stenbolî dî mesajê derbazbîyayîşî da û dîyar kerd ke ez hêvî kena ke çîyo ke ma tira tersenî, nêro sereyê ma.
Yuksekdage qiseykerdişê xo de daye zanayene çi heyf ke îqtîdaro ke pawitişê afetan ra wezîfedar o, kare xo nêkeno û ser de afetanê sîyasîyan vejeno û wina domnaye: “Çimkî Tirkîya de peynîya afetanê sîyasîyan nîna. Ewro erdlerzo ke Stenbol de bi nîşan da ke ma rewşêka senîne reyde têrî yî. Tebîet û quralê tebîetî nêyî da vîrê ma.”
Ez televîzyon ra musaya ke dozgerî ez sewq kerda
Yuksekdage dewamê pawitişê xo de va ‘Tirkîya de rezaleto sîyasî ame cuyayene’ û wina dewam kerde: “Ez doza ke tewqîfbîyaye ya ra reya dîyine ameya tewqîfbîyayene. Ez û Demîrtaş rojêk şîyî îfadedayîşê dozgerîye. Xora zafaneyê cuya ma ya zîndanî îfadeyan de derbas beno. Labelê dima ra ma fam kerd ke rewşêka îstîsnayî ya. Ewja de çîyê ke ma ra ame wendene de ma dî ke eynî çîyê ke ma tira tewqîfkerde yî. Ma herçiqas ke dozgerî ra va zî, dozgerî reyna zî wend. O wext ma fam kerd ke no karê dozgerî nîyo. Dozgerî hîna sewqê tewqîfbîyayîşî nêva, werişt şi. Ez televîzyon ra musaya ke ma seba tewqîfbîyayîşî ameyî sewqkerdene.”
Huqûqnasî nêşênî rewşe îzeh bikerî
Yuksekdage dewamê pawitişê xo de wina va: “Êdî wina bîyo ke huqûqnasî nêşênî rewşa huqûqê Tirkîya îzeh bikerî. Wexto ke ez sewq bîya, mi va qey seba mi wext ameyo dayene. Dima ra televîzyon de derbaz bi ke ma seba tewqîfbîyayîşî ameyî sewqkerdene. Dima ra ma vejîyayî vernîya Hakimê Cezaya Sulhî. Xora yeno zanayene ke îqtîdar tewr zaf mudaxaleyê nê mehkemeyan kena. Ma rêzgirewtişê xo yê şarî ver şêrî kamcîn mehkeme, ma do qisey bikerî û vatişê xo vajî. Seba ke rayapêroyî ma ra çîyêko winasî hêvî kena, ez vejîyaya mehkeme. Çîyo ke ameyêne zanayene ame vatene û qerarê tewqîfbîyayîşî vejîya. Tewqîfbîyayîşêk qîm nêkerd, 2 reyî tewqîf kerdî. Gelo nêyî ver fikrê mi, estene û muhîmîya HDPyî bedilîyena? Wa 22 reyî tewqîf bikerî, gelo heqîqete bedilîyena?”
MA / ANQARA