Domanê ke mîyanê şerî de cuyenî, kay û pêkaykerdoxê înan bedilîyenî. Xeyalê înan de êdî bîyayîşê doktor û mamostetî çin o. Kayanê domanan ra daxî boya barût û gonîye yena. Êdî destê domanan de gude, mîsket û sewbîna çîyî çin î, destê înan de sîlehê ke texteyan ra ameyî viraştiş, estî û kayanê şerî kay kenî.Ma taxanê Mexmurî de rayîr şonî… Destê domanan de sîlehê texteyinî estî û kayan kay kenî. Ez nizdîyê înan bîya û mi înan ra persê kayanê înan kerd. 

Domanan ra yewe va ‘ma kayê YPG û çete kay kenî’ Mi zî va ‘ma zî eşkenî kay bikerî?’ Domanî va ‘temam; şima bibê çete û ma zî benî YPGyî’ Wexto ke mi sebebê ci pers kerd, domanî va ‘YPG qehreman o, ma zî pîl bibî, ma do bibî qehreman.’Dima ra domanî bi fekê xo vatênê ‘tak tak’, qîrayênê û vatênê ‘ti merdî!’ 

Ma şaş mendî

Kênayêka şenike kewtbî pey lacekêk û ti ra va ‘ti merdî, çira ti qurnazî kenî?’ Mi destê kênaye ra tepişt û mi pers kerd ‘Se bî, çira ti wina hêrs bîya?’ Ya zî va ‘No lacek zexelî keno, mi ci kişt la vano; kênayî nêeşkenî mi bikişî.’ Mîyanê kayanê domanan de ma sey domanan şaş mendî.Hîna ma şaşbîyayîşê xo ser xo ra nêeştbî, di domanî pey ra ameyî sîlehanê xo yê texteyinan dayî piştîya ma û vatî ‘Êdî şima esîrê ma yî!’ Ma zî destê xo wedarna û va ‘temam ma teslîm benî’ û dima ra domanan ma berdî qerargehê xo. Mi persê ‘şima do se bikerî bi ma’ kerd. Domanan ra yewe va ‘sifteyîn ma do îfadeyê şima bigirî û dima ra eke şima poşman bîyî, ma do şima serbest veradî’ 

Destê domanan de sîlehê texteyînî

Domanan ra Berîtane dormeyê ma de fetelîyaye û pers kerde ‘Şima kam î? Kura ra yenî? Gelo şima poşman î?’ Mi zî va ‘ya, ma poşman î û ma do beşdarê şima bibî’ Berîtane kêfweş bîye û va ‘temam, ti tîma mi de yî’. Ez vana qey hende bi hawayo asanî esîrbîyayîş û dima ra azadbîyayîş ancax kayanê domanan de mumkun o. Domanî ma ra waştî ke ma sond biwerî, sondwerdişî ra dima ma pêreyde hewşî ra vejîyayî. Tewr peynî ma înan ra xatir waşt û ma kewtî rayîr. La xemê înan de nêbî. Destê domanan de sîlehê texteyînî, vera xo dayî hewşê keyeyanê bînan û dest bi kayêko bîn kerdî… 


AZA ROJÎYAN / ANF / MEXMUR