Ewro Roja Rojnamegeranê Cinîyan ê Kurdan o. Rojnamegerê cinîyî bi wesîleya na roje dîyar kerdî ke no rayîr bi Gûrbetellî Ersozan ameyo akerdene û ê zî hewl danî no rayîr de şêrî. Cinîyan da zanayene ke ewro ajans û televîzyonê cinîyan abîyî û va ‘gêrayîşê heqîqete yê cinîyan do qet nêqedîyo’.
ERDOGAN ALAYÛMAT / MA / STENBOL
7ê Teşrîna peyêne Roja Rojnamegeranê Cinîyan ê Kurdan o. Rojnamegerîya cinîyanê Kurdan ke serranê 90î ra nata bêmabên dewam kena, hertim heqîqete xo rê esas girewta. Dêrhênera pêroyî ya rojnameyê Ozgur Gundemî Gûrbetellî Ersoze ra nata zehmetîyan mîyan de hewl dîyeno heqîqete bêra dayene.
Ersoze vera ziwanê nêrî yê medya de serkêşîya xeberkarîya cinîye kerde. Mîraso ke hetê Ersoze ra ameyo verdayene, ewro hetê rojnamegeranê cinîyan ê Kurdan ra yeno domnayene. Rojnamegeranê cinîyan ê Kurdan qisey kerd û da zanayene ke ê do hertim pey heqîqete de şêrî.
Edîtora Rojnameyê Yenî Yaşamî Hîcran Urune daye zanayene ke Tirkîya de kerdena rojnamegerîye xeylê zehmetin o û wina va: “Nuştişê heqîqete seba rojnamegeranê Kurdan mîrasêk o û no mîras hetê Apê Mûsa û Gûrbetellî Ersoze ra ameyo verdayene. Serranê 90î de no rayîr ame akerdene û no het de nimuneya ma Gûrbetellî Ersoze ya. Ma hewl danî rayîrê aye de aver şêrî. Helbet zehmetîyê ci zaf î, labelê kêfweşîyêka girde ya zî. Ma hem Kurd, hem zî cinî yî û 2 reyî yenî pelçiqnayene. Ma nêyî baş zanî. Ajans, rojname û televîzyonê Kurdan yenî padayene, labelê ma bi mîrasê rojnamegeranê cinîyanê têkoşîndayoxan payan ser o vindenî.”
Cinîyî rayîrê Gûrbetellî de şonî
Muxabîra Jinnewsî Safîye Alagaşe dîyar kerde ke Gûrbetellî ra nata xeylê çîyî bedilîyayî û wina va: “Serranê 90î ra nata xeylê gamî ameyî eştene. Labelê zext û tedayê dewlete nêbedilîyayî. Herçiqas ke wina yo zî gêrayîşê heqîqete yê cinîyan zî qet nêqedîyeno. Rojnamegerê cinîyî hertim rayîrê Gûrbetellî Ersoze ra şonî. Seba ke qelema aye erd de nêmano, ajansê cinîyan ame awankerdene. Awanbîyayîşê ajansê cinîyan, cewabêko gird o. Cinîya Kurde rojnmagerîye de zî rayberîye kena.”
Xeylê cinîyanê Kurdan rê bîyo nimune
Xebatkara Kovara Demokratîk Modernîte Salîha Arase va ‘ganî tarîxê cinîya Kurde ra ver, cinîye ser o bêro vindetene’ û wina domnaye: “Dewletanê hakiman ewil hewl dayo cinîye ser o dagîrkerîye bikerî. Cinîye destpêk ra nata vera nînan de xover dayo. Cinîyan hertim vera zext û tedayan de xover dayo û rojnamegerîye zî parçeyêkê nê têkoşînî ya. Gûrbetellî Ersoze zî ser nameyê rojnamegerîya cinîyanê Kurdan de şorişêk kerdo. No xeylê cinîyanê Kurdan rê bîyo nimune.”
Wa raştîyî tarîtîye de nêmanî
Rojnamegere Zehra Dogane zî bale ante zext û tedayan ser û wina va: “Cinîyê rojnamegerî hertim vera qetlîyam, zulm û tewqîfbîyayîşan de bîyî hêvîya komel û cinîyan. Raştî û heqîqetî bi Gûrbetellî Ersoze hîna zaf ameyî dîyayene û no zî bi Gûrbetellî Ersoze hîna zaf vejîya aver. Ma proseso ke rojnamegerîye ser o zextê girdî estî ra derbaz benî. Vera heme zextan de qezencê rojnamegeran dewam kenî. Cinîyî tena ware de xeberan taqîb nêkenî, heme hetanê çapemenîye de zî ca gênî. Televîzyon û ajansê ke awan bîyî, estî. JIN TV nimune yo û heme beşanê ci de cinîyî xebetîyenî. Reyna ajansê Jinnewsî esto. Ewro kesê ke seba çareserîya probleman têkoşîn danî, benî hedef. Rojnamegerê cinîyî yê Kurdî hertim bîyî vengê raştî û heqîqete. Cinîyî saya bawerî û têkoşînê Gûrbetellî de ameyî ewro.”