A şew tam 6 finî, tiyareyê lejî amey ma ser. Fina peyin zaf nezdiyê ma bî.La belê hetê ma bombe nêkerd. Wexto ke, şewra ma werîştê, embazan vat ki, tiyaranê lej hetê Qendîlî de, Mezelê Şehîdan ê Şehîd Harûn bombe kerdo. Helbet dewlet jî zanayê, wija mezelê şehîdano û kes çiniyo. Feqet qandê vajo ezo şehîdanê şima jî, bi bombeyan çinê bikirî, mezelê şehîdan hedef girotîbî.
Eynî dewlet, rojê 25"ê mijdar de mezelê dewa Enzê û 1'ê tebax de jî dewa Zergelê hedef girotbî. Her 2 cay jî zey qerargehê PKK mûsnaybî. La belê ma xebatkarê çapemeniya azad şiyê wija û ma zûrê dewleta tirk û kiştoxîna ci rafînê çiman ver. Dewleta tirk a şewa qalkerdî jî, mezelê şehîdan ê Şehîd Harûn bombe kerdbi û bado jî bi zûrana hewl dayê şaranê Tirkiye bixapeyno. Îdîa kerdê de bi seyan gerîlay kiştê.
Ez û ANF ra Alî Guler, ma wextê zûranê gird ê dewleta tirk de, werîştîmi û bi heyecana vera cayê rendevûyê qandê vînayinê gerîlayan kewtîmi ray. Jew embaz ame û ma girotîmi. Badê 1 saeta ma resayê jew cayê sakînî. Û fina ma dî, çoşman ra gerîlay vejiyay verniyê ma. Heme hetan ra belûbi, ma ameyê cayê ciya. Atmosferê ciya bi. Ma nezdiyê 2 hefteyan wijayan mendîbi, la belê hewayê tiyay û cayanê bînan, pêjewîn ra ciyabi.
Amorê gerîlayê ma dî, vêşî nêbi. La belê vengo ki nezdî ra ameyê, winî mûsnayê gerîlayê perwerde vînenê. Xora cayê perwerdey ra fermandaranê YJA-STAR ra Zozan Berçelan amê. Bi kêfweşînê girda, ma berdîmi cayê roniştin. Gerîlayan ma rê awa honik ard û pey ra jî çay ard. Ma hetê ra çay şimit û hetê ra sohbet kerd. Çiyê ki ma qisey kerdê jî, bombevarnayinê tiyaranê lej ê tirk bi. Wija ma mûsayimi, ê tiyareyê lejê ma şew vengê ci eşna, xeylê noxteyê Mintiqanê Pawitinê Medya bombe kerdê. Gerîlayan tedbîrê lazimî girotîbi, la belê xebatê xo ramitê.
Badê nezdiyê 10-15 deqeyan ma dî, jor ra bi desan gerîlayê vera ma yenê. Fina siftayin bi, ez bi xo dîmenê wina vînena. Fina siftayin bi, komanê gerîla vînena. Bi vînayinê înan heyecanê min bi vêşî. Eynî wext de, sohbetê ma jî bi germ. Gerîlayan jî, êrişî zey leteyê siyasetê lejî ê Erdogan'î diyê. Vatê, tiyareyê lejî nêşenê çiyê bikirê. Wext wext fermandarê gerîla jî kewtê miyanê sohbetî. Vatê, dewleta tirk zûran kena. Hetanî nika, teniya 8 embazê ma şehîd kewtî. (Bado 3 gerîlayê bînî şehîd kewtî, hetanî 12'ê tebax amorê şehîdan 11 bî). Înan ra 2 fermandarî û ê bînî jî gerîlay bî.
Gerîlayê azadî, em vera zûranê dewlewta tirk û hem jî vera şehadetê embaz û fermandaranê xo zaf bi hêrsîbî. Qandê heyfgirotin qerardarîbî. Xora derheqê çalakiyanê embazanê xo ê Bakur de, ma xeberdar kerdê. Ê çalakî zey destpêkê perskerdinê hesabî mûsinayê. Wina vatê, 'Ma, hewna dest ci nêkerdo. Mayê Erdogan û rayveranê tirk pişman bikirê. Ma senî serra 2011 de dewleta tirk pişman kerd, ma senî Şemzînan û Gever ra Bêşebab quwetê tirk mehkûmê qereqolan kerdî, senî mecbûr mendî şirê keverê Rayver Apo bicenê, nika jî mayê înan pişman bikirê. Qandê Erdogan, Davutoglu û rayveranê tirk ê bîn suprîzê ma estê. Wexto ki, ma înan het ra aviriyayê jî, ma eşna gerîlayan Serhed ra hetanî Semsûr, Adana ra hetanî Estenbol, darbeyê girdî dayê quwetanê tirk ro. O çax ma fam kerd, suprîzê gerîlayanê çi bê.
Memed DREWŞ
memeddrews@hotmail.com