Colemerg de dewlet eşt qezaya Gever ser, tax û keyeyê welatijan rişnay, day ver adir. Geverijê ke bê keye mendî nika xêmî ronay û ewja de ciwiyenê. Welatijî hewl danê ke dirbetinanê xo derman bikerê. Ebe peyser ageyrayişê welatijan ra pîya sûk de reyna ganîbîyayen destpa kerd. La taxan de nêbîyayişê aw û ceyran welatijan vistneno zehmetîyanê giran. 


Hewcedarîyê ciwiyayişî 

Rîwalê pêçnayişê dirbetinanê Gever û wayîrvejyayişî gureyînî ramenê. Gûreyînê yardim yê kordînasyonê înşa û poştdayen ke bi înisîyatîfê Şaredarîya Gever destpa kerd ramenê.  Kordînasyonî serva yardimdayenê Gever vendayiş da û aşkere kerd ke hewcedarîyê bi gida, betanîye, werdişê domanan, doşegê sunger, quşxane û malmezeyê pakî estê.

Temsîlkarê Kordînasyonê Gever yê Komeleya Paştdayenê Rojawa ra Metîn Alma derheqê babed de ANF rê qisey kerd û da zonayen ke ekîbo ke ame ronayen sifte gureyînê tespîtkerden û gureyînê destegê gida ramenê. Alma da zonayen ke xêlê taxê Gever ameyê rijnayen û wina va: “Kêmîyê gida, kinc û betanîye zaf o. Çîyê ke serva ciwyayişê jew kesî hewce kenê rê hewcedarî estê. Ma kolîyê destegî kenê hadre.” 


Tora ma roj bi roj bena gird 

Alma da zonayen ke se ra 80yî yê Gever ameyo rijnayen û veng da kesê ke zey zerîdarî şirê bigurwê: “Wa bîrê tewrê gureyînan bibê. Veng dana pêrokîn kesê ke wayrê wijdanî yê. Wa bîrê tewrê gureyînanê înşa bibê. Tora ma ya kordînasyonî roj bi roj bena hera. Ma bi 8 kesan destpa kerd û nika resayime 60 kesan. La hewcedarî bi hona jêde kesan esta. Ma teyna gureyînê vilakerdin nêramenê. Eve malbatan sohbet zî kenime. Ma çike lez xo biresnê malbatan hendayî rind beno.”


Şima zî bibê zerîdarî  

Zerîdara bi nameyê Fatma Aydin ke Stenbol ra serva poştdayen şî Gever zî vist vîrî ke wexto ke ê resayî qeza texrîbat û rijnayişekê gird ra rî bi rî amey.  Aydin da zonayen ke 20 hezar însanî bê keye û bê war mendîyê û wina va: “Ez zey zerîdarî îta de ya. Taxan de xêlê banî rijîyayê. Yardimê ke yenê ma hewl danê ke biresnê welatijan. Hewcedarîye lezîn eve gida, betanîye, petê cenîyan, werdişê domanan û sungerê rawextiş esto. Netîceyê rijnayişî xêlê însanan bi tesîr kerd.”

Aydin vist vîrî ke Gever de seatanê şew de hewa zaf serd o û vengê yardimê lezîn kerd.   


 ANF/COLEMERG