Zelzeleyê sifte û gird 3ê aşmî de, seat 01.27î de, nezdiyê dewa Açikguney de qewimiya. Zelzeleyî, Gêxî û dewanê ci ra piya, Çewlig, sûk û qezayanê çorme de zî tesîr kerd. Qeza de zerreyê çihar rojan de 100 erdlerzînê qijkek-werdî qewimiyay. Netîceyê nê erdlerzînê ke dewanê Abvank, Xaror, Sîwgelik, Xûpis û Oxas de bî de bi desan keye-çêyeyan de xesar vejya.
Welatijî teber de manenê
Ronişteyê qeza yê ke rîwalê tersê deprem-zelzele nêeşkenê şirê keyeyê xo û teber de hewayê serdin de manenê û zehmetî ancenê. Xeylekê welatijî zî wesayîtanê xo de kewnê ra. Kesê ke merdimê ci sûkanê çorme de estê, bar kenê şinê îyna het. Herzewbîn semedê deprem psîkolojiyê qij-domanan xerab biyê.
Zey ‘cayê afet’ îlan nêbi
Rexmê xesarê keyeyan û zehmetiyê welatijan yê 4 rojan, sazgehê dewlet hona nîkewtê dewre. Wexto ke mesele Kurd û Kurdistan bo, sazgehê dewlet çimanê xo gênê, destê yardim derg nêkenê, welatijan bi mexdûriyetê xo ra tenya ternenê. 4 rojanê peynî de jew zelzeleyê gird û 200 zelzeleyê werdî bî, la dewlet hona zî no mintiqe zey ‘cayê afet’ îlan nîkerd, cok ra heta nika yardim zî nîberd.
Dewlet çi pawena?
Heta nika ronişteyan rê ne cayê mendiş ame tenzîmkerdin, ne zî konteynirî ame rusnayen. Ronişteyê qeza verra sermiyanan û sazgehanê dewlet bi hêrsiyê. Welatijî vanê ‘dewlet merdişan pawena gelo?’ û rexne kenê. Goreyê zonayişê zanyaran erdlerzînokî dê dewam bikerê.
Çewlig zey mintiqeya zelzele-erdlerzîn yena şilasnayen.
* Çewlig de 22ê Gulan 1971’î de bi qûwetê 6.8 erdlerziya û netîce de 878 welatijan weşiya xo kerd vinî, 700 kes bî dirbetin, 9 hezar ra vêşî banî riziyay.
* 1’ê Gulan 2003’î de zî, 15 km bakûrê navendê Çewlig de, bi qûwetê 6,4 erdlerziya û netîce de 176 welatijan weşiya xo kerdî vinî, 625 banî rijiyay.
NAVENDÊ XEBERAN