Endamê Konseyê Rayverîn ê PKK'î Murat Karayilan tewrê jew programê taybet ê televîzyonê Ronahî bi û derheqê serkewtinê Girê Spî de mesajê muhîmî day.
Karayilan'î ard ziwan ki serkewtinê Girê Spî teniya serkewtinê jew cay niyo, serkewtinê stratejîk yê wayirê mahneyê gird û tarîxî yo û wina vat:
Bi serkewtinê Girê Spî, DAIŞ darbeyê girdî werdî. DAIŞ wija çiqas darbey werdî, hend dewleta tirk û AKP jî darbey werdî. O kever, boruyê nefes ê DAIŞ bi. Madeyê pa bombey viraziyayê û çetey wija ra ravêrdê.
'Suriye îradeyê veti werte'
Karayilan'î dazanayin ki serkewtinê Girê Spî, gunî daya şoreşê Rojawa û wina vat: "Kurdan bi perspektîfê neteweyê demokratîk, Suriye îradeyê veti werte. Eno çiyê zaf muhîmo. Çimki Suriye wayirê şar, kultur û baweriyanê ciyaya. Zîhniyetê netew-dewlet ê zey jû dewlet û jû milet zirar dano şaran. La belê federalîzm şeno heme şar, bawer û kulturan bigiro xo miyan. Sîstemê kantonan heme cayê Suriye de şeno esas bigeyriyo."
Karayilan'î eleqe ant serkewtinê HDP ê weçînayinê 7'ê hezîran ê Bakurê Kurdistan û Tirkiye ser û wina vat: 7'ê hezîrani, qandê kurdan serkewtinê siyasî bi. Fina siftayino kurdê Bakurê Kurdistanî wina jûwîna xo ronenê. Hetanî nika, kurdan miyan de, jûwînê winayin nêvejiyabi werte. Badê ena serkewtin, 15'ê hezîrani de jî Girê Spî xelisiya. Bi ena serkewtina dawa azadiyê şarê kurd bi quwet bî.
Mûrat Karayilan muhîmînê wayir-vejiyayinê destkewtinanê Rojawa jî ard ziwan û wina vat: "Bi guniya şehîdan serkewtinhê girdî vistiyay dest. Ez veng dana gencanê kurd û vana ageyrê welatê xo. Şert û mercî çi benê wa bibê, gerek gencî ageyrê. Çi karê gencanê Rojawa Estenbol de esto? Çi karê înan Hewlêr, Silêman û teverê welatî esto. Gerek rojê ravey ageyrê û wayirê destkewtinan vejiyê."
NAVENDA XEBERAN