Goreyê îstatîstîkan Tirkîye de 384 girotxaneyî û 184 hezar ra vêşêr tehişteyî estê. Nê tepişteyan ra 760ê ci nêweş ê giran ê û roj bi roj nezdîyê merdiş benê. Hikûmeta AKP ke hurendîya ke tepişteyanê nêweş serbest verado, tepişteyan zindanan de merdişî ra ternena.
Serokê şaxa KHÎ yê Amedî Racî Bîlîcî ke derheqê babed de qisey kerd vist vîrî ke heqê esasî û însanî yê tepişteyanê sîyasî bi kêfî yenê binlingkerden û da zonayen ke dewlet bi heyfgiroten nezdîyê mehkûman bena. Bîlîcî aşkere kerd ke pêvacoyê peynî de pirodayişan de bi merdişê esker û polîsan zexto ser tepişteyan zî vêşêr bi û qiseyê xo wina domna: “Girotxaneyê Amedî ra remayişê 6 tepişteyan ra tepya xêlê tepişteyê bîn amey sirgûnkerden. Girotxaneyan de raştê şîdet, muameleyê xirabîn û îşkence amey.”
Terkê merdişî bîyê
Serokê şaxa KHÎ yê Amedî Bîlîcî hayr ant rewşa tepişteyanê nêweş ser zî û aşkere kerd ke mehkûmê nêweş eve binlinkerdişê girdî yê heqan ra rî bi rî yê. Bîlîcî da zonayen ke tepişteyê nêweş nê kirêşyenê nêweşxane û derman nêbenê û derheqê babed nê zonayişan da: “Xêlê tepişteyê nêweş ke şinê nêweşxane nînê dermankerden, tayê ci zî weşîya xo kenê vinî. Serpirodayişanê ma yê Wezîrtîya Edalet û eve îdareyanê girotxane netîce nêda.”
Îşkenceyê tecrîd sûcê merdimatî yo
Racî Bîlîcî hayr ant tecrîdê vera Rayverê Şarê Kurd Abdullah Ocalan’î ser û vist vîrî ke girotxaneyan de kerdenanê binlinkerdişê heqan ra jew kî tecrîd o û wina va: “Jû serrî ra vêşêr o ser brêz Ocalan’î de tecrîdeke bi kêfî esto. Çarçoveyê na tecrîdî de brêz Ocalan ne êşkeno bi malbat, ne bi pawitox û ne kî êşkeno bi sazgehanê netewî û mavênneteweyî pêdiyayiş virazo. Goreyê nay dewleta Tirkîye sûcê merdimatî kena. Çike no şiklê tecrît ke açarnîya îşkence sûcê merdimatî yo.”
Gam bi gam nezdîyê merdiş benê
Bîlîcî ke dûştê binlinkerdişê heqanê tepişteyan veng da raya pêroyîn aşkere kerd ke ganî babeda tepişteyanê nêweş de hestîyarey bibo. Bîlîcî da zonayen ke bi girotxaneyan de mayiş ra pîya tepişteyê nêweş roj bi roj hona vêşêr nezdîyê merdişî benê û qiseyê xo bi nê vatenan qedîna:”Ganî desinde raya dermankerdişê tepişteyanê nêweş bîro akerden û tepişteyê nêweş ganî hetê hikûmet serbest bîrê veradayen. Hikûmet bi kêfî û raporanê îdeolojîk tepişteyanê nêweş serbest nêverdana. Nê polîtîkayî hikûmet dûştê heqê merdiman dûştê peymana mavênneteweyî ke Tirkî îmze eşta û dûştê makeqanûna Tirkîye yê. Nayî ra ma venga peyser dayişê heqanê tepişteyanê sîyasî danê.
ANF/AMED