AKPyo ke bajaranê Kurdistanî de qirkerdişê sîyasî û kulturkîyî keno, dişmenîya xo ya vera Kurdan ê dimayê weçînitişê 31ê Adare de zî dewam kerde ke nimûneyêkê nê zî Bedlîs de vejîya werte.
Partîya Herêmanê Demokratîkan (DBP) weçînitişanê serra 2014î de bi nisbetêkê berzî Bedlîs de bi ser kewtbî, la hukmatê AKPyî qayûm şaredarîye de bica kerd û vera kultur û ziwanê Kurdkî de dest bi qirkerdişî kerd. Bi nê amancî mektebî, kreşî û karê kulturkîyî yê Kurdkî ameyî qedexekerdene. Verê weçînitişanê cayîyan ê 31ê Adare û dimayê ci bi hezaran sîyasetmedar û welatperwerê Kurdî ameyî tepiştene.
Tabelaya bi Kurdkî û Tirkî ya demê DBPyî de vernîya awanîya Şaredarîya Bedlîsî de amebî bicakerdene, bi fermanê şaredarê AKPyijî Nasrûllah Tanglayî yo ke 31ê Adare de amebi weçînitene amî wedartene. Herinda na tabela de tabelayêk ke tena bi Tirkî amîya nuştene amî daleqnayene. Tanglayî heman wextî de tabelaya ke dekewtişê bajarê Bedlîsî de ser o bi Îngilîzkî, Kurdkî û Tirkî “Şima bi xêr ameyî Bedlîs” nuştbi wedarte. Herinda na tabela de zî tableya ke tena bi Tirkî ya bi ca kerde. Şaredarîya Tetwanî ya AKPyije zî tabelaya Kurdkî ya ke vernîya awanîya Şaredarîye de bîye wedartbî.
Qedexekerdişê Kurdkî û ercanê Kurdan demê îqtîdarê AKP-MHPyî de bi sîstematîk. Nimûneyêko bîn ê nê hêrişan Bedlîs de vejîya werte. Na rey zî hêrişê gorê sîyasetmedaro Kurd o namdar û tarîxnas Şerefxan Bedlîsîyî û keyeyê ê ame kerdene.
ANF / BEDLÎS