Seke yeno zanayîş îlanbîyayîşê OHALî ra dima çarçewaya KHKyan de xeylê sazî û dezgeyî ameybî padayîş. Nînan ra yewe zî Gun TVyo ke 27ê êlula 2016î de amebî padayîş o. Badê ke Ozgur Gun TV amebî padayîş, dest ronîyabî mal û milkê ci û heme ameybî rotiş.
Dima ra Ozgur Gun Tvyî seba tepîya girewtişê mal û milkê xo û sewbîna doze akerdbî. Muşavîrîya Huqûqî ya RTUKî pawitişo ke 8 rîpelan ra pê yeno, erşawite mehkeme. Muşavîrî pawitiş de cezayê îdarî yê ke dîyaybî televîzyon û melumatê îstîxbarî û gerreyê ke hetê tayînan ra ameybî kerdiş sey mehne nîşan daye û waşte ke doze bêro redkerdiş.
Muşavîrî mehkeme ra waşte seba ke şîrketo ke Ozgur Gun Tv giredayeyê ci yo, 21ê teşrîna peyêne de amebî padayîş, faalîyetê tîcarî yê şîrketî qedîyayo, kesê ke doze akerdî, selahîyetê înan yê akerdişê doze çin o û wina vato: “Cok ra ê nêşenî doze akerî û ganî doze bêro redkerdiş. Padîyayîşê televîzyonî goreyê Qanûno bingeyî û peymananê mîyanneteweyîyan munasîb o. Heta nika 7 reyan cezaya îdarî dîyayo nê televîzyonî.”
Reyna RTUKî pawitişê xo de cezayê pereyî ke dîyayî televîzyonî sey mehne nîşan da û doza ke hetê televîzyonî ra ameye akerdiş zî bihawayo bêhuqûqî dî. Heto bîn ra RTUKî mehkeme ra waşt ke wa heqê doze, mesrefê avûkatî û sewbîna gerrekaran ra bêrî girewtiş.
MA /AMED