Sernustîs mi niya napa, çike waxtêde serokkomarê tirkî Abdullah Gul siyasetvananê Başurê Kurdistanî ra vat bî “nî postalu lêsenê.”

Mavên ra xêle waxt vêrd ra, sermiyananê dewleta tirkî derheqê Başurê Kurdistanî de fikrê xo vurna, ya zî mejburî mendî. Tekiliya xo ya siyasiye û aboriye vurnê. Na vurnayîs ra tepiya sermiyanê tirkî çever bi çever fetelayî posatlî lîştî. Peyniye de raştiya Başurê Kurdistanî qebul kerde.
Nika Rojavayê Kurdistanî xorê kerdo hedef.  
Siyasetvananê tirkî naye ra avê ke seweta Başurê Kurdistanî se vatenê, nika seweta Rojavayê Kurdistanî vanê.
Serre ra avê Rojavayê Kurdistan de kurdan xoseriya xo gurete xo dest. Nî rozanê peyenan de zî teqetanê YPG verva El-Nusra Serêkanî de dapêro û qeza El Nusra dest ra gurete. El Nusra AKP ra yardim cena. Naye ser siyasetvanê tirkî, bi taybetiye azayê hukumatê AKP bî har.
Wezîrê “Pîsîşlerî” yê tirkî Ahmet Davutoglu kurdan tehdît keno vano “lawatiyayîs, halode de facto afirnayene, peyniya xo xiravin bena.”
Şewirmendê serokwezîrê tirkî, Yalçin Akdogan vano “PYD gune pê adir kay mekero.” Yalçin Akdogan zî bi na vatîs onca Kurdan tehdît keno.
Heto bîn ra zî axayê xo zur vezeno. Çike Recep Tayyîp Erdogan şervananê kurdî ra vat bî “nî Zerduştî rê îtîqat kenê.”
Her kes zoneno ke îtîqatê Zerduştiye de adir rolode girs kaykeno. Yalçin Akdogan gune bizono ke, Zerduştî adir ra nêtersenê.
Jû zî Akdogan endî fambikero, ke Rojhilatê navînî hora gola adir yo.
Mordemo ke îtîqatê xo adir o, O adir de nêvêseno, pêseno. Kurdî zaf vêsayî û pêyniye de pêsayî.
Îta de reyna beno zelal, ke dewlet û hukumatê AKP halkerdena mesela kurdî ra zaf dûr yê.
Jê her timî onca tehdîtan vaydanê. Kotî ke vengê kurdan vejiya, sermiyanê dewleta tirkî desinde bi tehdîtan kunê dewre.
Ne tarîxê xora tewa musenê, ne zî tarîxê domonanê adirî ra!
Kesode baqil û kamil çîno, ke nînan ra vazo ‘ero biko niya mekerê, peyniye de onca sima postalu lêsenê, qedrê kurdan bizonê!’
Zovîna hona zaf postalu lêsenê siyasetvanê dewlet û hukumatê AKP.
Postal xojîbê to bo, heskerdoxê to nêqedîne.
Goşkar postalu biya postalu!