Vera hêriş û tedayanê hukmatê AKPyî de çend hepisxaneyanê Tirkîya de grevê vêşanî ameyo destpêkerdiş û no grev her ke şono gird beno. Heta nika 6 hepisxaneyanê zey Şakran, Edîrne, Wan û Sîncan de tepişteyan grev daybî destpêkerdiş. Hepisxaneyê Edîrne de grev roja 18, Şakran 26, Sîncan de 16. de yo.
Hepsîyan seba grev 3 waştişê esasî rêze kerdî. Waştişê hepsîyan nê yî: Wa şert û mercê Rayberê Şarê Kurdî Abdullah Ocalanî bêrî başkerdiş, wa şero ke Kurdistan de esto bêro vindarnayîş û wa zext û tedayê ke hepsîyan ser de yî bêrî wedarnayîş. Babete ser o Endama Însîyatîfê Piştîdayîşê Hepisxaneyan Avûkat Şule Recepogluye qisey kerde.
Qet cewabêk nêame
Recepogluye va ‘heta nika hepsîyî vera zext û îşkenceyan de muracatê xeylê cayan kerdî, labelê qet cewabêk nêame û dest ronîya mektubê ke ma erşawitbî hepisxaneyan’ û wina domnaye: “Seba ke hepsîyî nêşênayî vengê xo biresnî teber, sey çareya peynî dest bi grevê vêşanî kerdî. Hepsîyî vanî ‘eke ma cewab nêdî nê zext û îşkenceyan, do heme hepsîyan ser de sîstemê tek rengî bêro awankerdiş’.”
Ameyî derbkerdiş
Recepogluye dewamê qiseykerdişê xo de va ‘badê ke mudir tayînê Hepisxaneyê Edîrne bîyo, îdare ameyo bedilnayîş, dest ronîyeno kitab û mektubanê hepsîyan ser’ û wina dewam kerde: “Demo peynî de şopa engîşte ya hepsîyan yena girewtiş, labelê hepsîyan rê nîno vatiş ke çira yena girewtiş. Hepsîyî vanî no çîyo ke keyfî yo. Xora wexto ke benî şopa engîşte gênî, hepsîyan ra nêvanî, bi zorî benî û hetta îşkenceyê hepsîyan zî kenî. Reyna hepisxane de dest ronîyayo kitab, makale û hîkayeyê hepsîyan ser de. Heto bîn ra 3 hepsîyan berdî odeya sîngerin û ewja de derb kerdî.”
Do gird bibo
Recepogluye qiseykerdişê xo de va ‘hepsîyan hewl dayî vengê xo biresnî teber, labelê nêşênayî biresnî û 6 hepsîyî dest bi grevê vêşanî kerdî’ û wina qedênaye: “Hepsîyan waştişê xo zî wina rêze kerdî: ‘wa kerdişê bikêf yê îdareyî peynî bibî, wa tecrîd biqedîyo, wa şert û mercanê hîna başan de heqê tedawî bidîyo înan, heqê sohbeto ortax, îşkence û muameleyo xirab biqedîyo. Eke nêyî nêbî do grûba dîyine bikewo grev.’ Heta nika ma zî çend pêvînayîşî mudirê hepisxaneyî reyde kerdo, labelê ma pêvînayîşê xo ra ti netîce nêgirewto.”
SADÎYE ESER / DÎHABER / STENBOL