Amed de amey pêhet
Kombîyayîşê 29. yê Grûba Xebate ya Vateyî, bi mazîvaneya Beledîyedê Sûka Pîlî yê Amedî Otêlê Mîtannîa de 27ê aşme de dest pa kerd. Şarandê cîya cîya yê Kurdistanî û Ewropa ra 21 kesî beşdarê (tewrê) kombîyayîşî benê. Kombîyayîşo ke roja Dişeme dest pa kerd ewro qedîno.
Azayê Grûba Xebate ya Vateyî ra Serdar Bedirxan, Munzur Çem, Haydar Diljen, J. Îhsan Espar, Ehmed Kirkan, Seyîdxan Kurij, M. Malmîsanij, Selîm Mûrat, Mehmûd Nêşite, Şukrî Urgun, Muzafer Xeylanij, Cemal Polat Aydin, Denîz Gunduz, Netîce Altun, Zulkuf Demirtaş, Doxan Karasu, Nureddîn Celalî, Îbrahîm Bîngol, Aydin Bîngol, Ehmedê Dirihî, Îrfan Çelîk kesê ke beşdarê kombîyayîş bîyî yê.
Termê dayreyê beledîye
Goreyê zonayişê ke azayê Grûbe Haydar Diljenî dayî no kombîyayîş de Grûbe termandê beledîyeyî (şaredarî) ser o xebitêna. Termê ke dayreyê beledîyeyî şixulnenê seba kirmanckî (zazakî, dimilî, kirdkî) yenê çarnayîş.
Grûba Xebate ya Vateyî seba averberdişê kirmanckîye bi serrano xebêtyena, emeg dana û heta nika zaf xebatê erjaye viraşta. Grûbe serranê peynî de ser term û standardîzekerdişê kirmanckî ser de gureyîna. Grube 2’ê Çile de 20. serrgêra xo bi şewekê bimbarek kerd. Şewa ke Amed de bi slogana ‘ziwan kamîya ma ya’ Navendê Kiltûrî yê Cegerxwînî de virazîya de bi desan emegdarê kirmanckî beşdar (tewr) bî.
NAVENDÊ XEBERAN