Komeleya Çandê ya Dîcle Firat a li Amedê xebatên xwe dimeşîne di 26’ê Îlonê de li gundên girêdayî navçeyên Amedê dest bi organîzekirina şahiyan kir. Komele ku rastî eleqeyeke zêde ya niştecihên gund hat, Solîstê Koma Azad Farqîn der heqê xebatên xwe de agahî dan. Farqîn got ku niştecihên gund girîngiyê didin xebatên çandê û wiha got, “Mirovên li gundan dijîn dema me dibînin kêfxweş dibin. Li gundan cihekî taybet ê çanda me heye. Bi vê zanebûnê me dest bi xebateke wiha kir. Em ji wan fêrî hin tiştan bûn. Her wiha têkildarî pêvajoyê jî me nêrînên wan girtin. Şahiyên me baş derbas dibin.”

Farqîn, anî ziman ku Koroya Zarokan a Komeleya Çandê ya Dîcle Firat pir bala niştecihên gundan dikişîne û zarokên gundan jî bi koroya zarokan re di nav pêwendiyan de ne û wiha berdewam kir, “Bi şaredarî û rêxistina BDP’ê ya Sûrê re em bernameyên hevpar çêdikin. Ji bo piştevaniyê bi me re tên gundan.”
Farqîn diyar kir kesên ji gundan koçber bûne wê dîsa vegerin û wê demê dê biçin cem wan û wiha dawî li axaftina xwe anî, “Em dixwazin kesên bi darê zorê ji gundên xwe koçber bûne bibînin û bi wan re nîqaş bikin. Em ê bê çi awayî ji gundên xwe hatine derxistin nîqaş bikin. Em ê çand û berhemên xwe yên hunerî pêşkêşî niştecihên gundan bikin.”

DÎHA/AMED