Mîrasê Apê Mûsa, Gurbetellî Ersoz, Yahya Orhan, Huseyîn Denîz, Kemal Kiliç, Ferhat Tepe, Nazim Babaoglu û wesîyetê 89an. Dûştê faşîzmî de sondê serkewtişî, sembolê çok ronêdayişî. Tenya jew rojname nîyo, roşnîya çiman, gurp-gurpa zerrîyan, wijdanê raştîyan o. Hemverê tersonekan de sembolê cesaretî yo, dûştê tanq û tifinganê dewlet de şarî het de yo.
Ozgur gundem sembolê estanika xoverder yê çapemenîya azad o. Vengê kurdan, yê lazan, ereban, alewîyan, ermenîyan, xirîstîyanan, ekolojîstan, cenîyan, gencan û emekdaran o. Wexto ke medyaya hetkar raştîyan rot, emekdaranê çapemenîya azad ganê xo da, la raştîyan ra tawîz nêda. Her sazgehekê çapemenîya azad zey mektebeke, zey qerargehekê şoreşgerî o.
Zext û zorvajiyê ser Gundem û çapemenîya azad bi xeta ke temsîl kenê, raştîyê ke taqîp kenê ra eleqedar o. Dîrek bi tekoşînê serbestî yê kurdan û azadîwaştan ra eleqedar o. Çike faşîzm wazeno pêrokîn qilêrînanê xo binimno. Medya ra pîya, xêlê partî, sazgeh û çormeyî teslîmê faşîzmî bîyê. Tenya ala ke va dana û teslîm nêbena ala çapemenîya azad û mûxalîfan a. Çapemenîya azad ke bi rojnameyê Hawar zey îsyanekê destpa raywanî kerd, bi serrano çemberê adirîn ra vêrena ra. Nayî ra nika wexto ke faşîzm vejyayo merhaleyekê tewr corîn de wazîyeno çapemenîya azad zî bêveng bikero.
Bêvengkerdişê çapemenîya azad vêşîkerdişê îşkence, bêhiqûqî û binlinkerdişê heqan o. Hona vêşî qetlîam o. Wexto ke 1992 de Newroza Cizîr de sivîlan day ver guleyan, tenya çapemenîya azad dî. Wexto ke Licê de qetlîameke gird viraştî, bi hezaran dewan day ver adir û veng kerdî, wexto ke bi hezaran kesan eştî bîranê asîtî tenya çapemenîya azad taqîp kerd. Wexto ke Roboskî de 34 kesan kiştî çapemenîya hetkar çimanê xo girot. Zimistanê emserr de ganî bi ganî însanan veşnay. Cenazeyê cenî û domanan bi rojan kuçeyan de seba ke kutukî bûrê ternay. Seba ke kêfê ci waştî kam ke şêmigê keyeyê xora vejya teber day ver guleyan. Tenya 8 aşmanê emserrî de hezaran ra vêşî însanan qetilkerdî. Nê pêrokîn sûcê merdimatî tenya çapemenîya azad deşîfre kerd û pêrokîn dinya rê resna. Seba ke çapemenîya azad nê heqîqetan ra tawîz nêdana nika hedef de ya.
Estanika Ozgur Gundem, estanika pêrokîn çapemenîya azad a. Gundem, serranê herbê qilêrîn de, wextanê ke ‘cînayetê kiştoxê ci nêdîyar’ roj bi roj qewimyay, dewî amey veşnayen, merdimatî erdî de kaş kerdî , 30ê Gulan 1992 de Stenbol de destpa weşan kerd. 15ê Çile 1993 de ame giroten. La 26ê Nîsan 1993 de reyna bi rayverîna Gûrbetellî Ersoz de destpa weşan kerd. Badê çend aşman 10ê Kanune 1993 de polîsan eşt rojnameyî ser û gurekaranê ci girot bin çiman. Rojnameyê gelenega azad heta serranê 2010î bi nameyanê cîya pey heqîqatî nêverda. Ozgur Gundem ke 4ê Nîsan 2011î de reyna ronîya. Beno ke gurekarê çapemenîya azad bivûrnîyê, la mîrasê ci, ala ci erdî de nêmanena.
Çapemenîya azad zey laserekê, zey zeryayekê herikyeno vera okyanûsan. Pêrokîn qilêrînan dano ver xo, cayo ke vêreno ra keno pak û kes nêşkeno vernîya na şîyayişî bigîro. Çapemenîya azad do dêsê bendawanê faşîzmî bi temamî birijno. Çok rodayiş teslîmîyet û îxanet o, xoverdayiş ciwîyayiş o.