17ê teşrîna peyêne de qezaya Şêrwanî yê Sêrt de madenêk de hezaz qewimîyabî û netîceyê hezazî de 16 karkerî binê enkazî de mendbî. Dima ra nizdîyê 1 aşme xebatê raxelisnayîşî virazîyabî. Netîceyê xebatanê raxelisnayîşî de zafaneyê karkeran ameyî vetiş labelê operator Îbrahîm Kilinç hema zî nêameyo vetiş. Qeza ra dima derheqê qeza de raporê heyetê pisporî ame amadekerdiş û goreyê raporî mudurê şîrketî, sermuhendîs, şefê şantîye, wayîrê şîrketî û sewbîna zaf kesî bi hawayo qusurin ameyî dîyayîş. Babete ser o Endamê Heyetê Îdareyî yê Odeya Muhendîsanê Madenî yê Şûbeyê Amedî Dogan Hatunî qisey kerd.
Merdimî ser o rijîya
Hatunî va ‘hezaz aşma temuze ke dalpêyêk varan daxî nêvarayo de qewimîya’ û qiseykerdişê xo wina domna: “Goreyê awa bin erdî tedbîrî nêameyî girewtiş. Eke merdim no het de tedbîr nêgîro, o wext xoza nêyî qebul nêkeno. Eke ti binê koyî bikinî, o zî ser to de yeno war. Seba zanayîşê nêyî lazim nîyo ke merdim muhendîs bibo. Wexto ke ma seba cigêrayîşî şîyî, karkerî ma ra va înan bi desan reyan patronî hişyar kerdo la çimvêşanîya patronî ver, hezaz virazîya.
Sektoro taybet de bi malîyetêko tay û karêko zêde kar yeno viraştiş û no zî beno sebebê çîyêko winasî.”Hatunî dewamê qiseykerdişê xo de va ‘qezayê ke ocaxanê madenî de qewimîyenî, seba ke kontrolî çin î, qewimîyenî’ û qiseykerdişê xo wina qedêna: “No yew serra peyêne de qet kontrol nêameyo viraştiş. Seba ke ewleyî çin a, kontrol nîno karî ser. Eke ewleyî çin a o wext ganî şantîye de kar bêro vindarnayîş. Wexto ke Avşînê Elbîstanî de qeza virazîya û o wext ê şîrketî rê ceza biameyêne dayîş, nika Şêrwanê Sêrt de no qeza nêbîyêne. Derheqê hedîseyî de nezaretwanê daîmî, muhendîsê jeolojî, muhendîsê kîmya û muhendîsê weşîye ameyî tewqîfkerdiş, la ganî nê tewqîfkerdişî serê qusurê şîrketî nêpadî.”
DÎHABER / SÊRT