MURAT KUSEYRÎ / ANF / STOCKHOLM
Her çiqas ke vera elewîyan de hêriş û zextî virazîyenî zî elewîyî zere û teberê welatî de hêzê xo gird kenî û seba yewbîyayîşê xo cemxaneyan akenî. Elewîyê ke Swêd de ciwîyenî, bajarê Uppsala de bi sloganê ‘yew tugla zî şima bîyarê’ cemxane akenî. Zaf hûmarî de sîyasetmedar, parlamenter û serekê sazî û dezgeyan beşdarê şewe bîyî.
Sereka Federasyonê Elewîyê Swêdî Nevîn Kamîlagaoglûye qisey kerde û wina va: “Aşma kanûne aşmêka tarî ya. Qetlîyamê Gurgum û Roboskî zî na aşme de bîyî. Mîyanê na aşma tarî de Cemxaneyê Uppsala do bibo roşn û hêvî.” Parlamenterê Swêdî Anders Osterbergî wina va: “Ma seba akerdişê cemxaneyî hetkarî danî elewîyan. Badê teşebbusê derbe, AKP bi qerarnameyê hukmê qanûnî azadîya çapemenîye ser o zextî ronayî.” Serekê Konfederasyonê Yewîtîya Elewîyan yê Ewropa Tûrgût Okerî zî wina va: “Merdim kura de beno wa bibo ganî goreyê berpiryarîya prosesî hereket bikero. Eke ma wina nêkerî, ma do çin bibî.”Parlementerê HDPyî yo kehen Mahmût Togrûlî zî va: “HDP heme bawerî û nasnameyan mîyanê xo de hewênena. Cok ra AKP û dewleta tirk HDPyî xo rê taluke vînenî û hedef gênî. Ma vera înan de bi hêzê Seyîd Riza, Mehmet Tunç, Sêvê Demîre û Arîn Mîrkane xover bidî.” Şewa piştîdayîşêyewbînan bi deyîranê Aynûr Haşhaşe, Alî Çagan, Rozerîne û Asli Yalçinogluye û bi semahan qedîyaye.