Tornê ecdadê qetilkarî de tabî xuya ecdadî esta. Ecdadî çelûçukê xo kistenê seweta bext û textê xo. Osmanî de kayî bî, tornî de zî nî kayî estê û rastke nêqedînê. Ma kurdan nî 10 serranê peyenan de çond reye nî kayî tomkerdî. Peyê çekuyanê rindekan de xezev û tofanê pîlî wedardaye bî.
Tebaxa 2005 de serokwezîrê tirkî Amed de vat “dewleta ma verva kurdan xeta û guna kerda, ma gune ebi tarîxê xo bêrîme têrî. Na mesela, mesela min a.” Miyanê nî vatîsan ra 8 asmî ranêvêrdî, asma adare 2006, onca Amed de miyan de domonî xêlê gencê kurdî ameyî qetil kerdene. Tornê ecdadî bi na tore ebi tarîxê xo ame têrî! De bêrê îman bikerê, tornê ecdadî rê!
2009 de tornê ecdadî “açılım” ra qesey kerd. Dima PKK 34 azayê xo seweta haştiye rusnayî Tirkiye. Dewleta terorîste se kerd? Nî mordemî dayî mehkeme, taye estî zîndanan, taye zî mecbur onca peyser şî. “Açılım” Alaturka vanê na hal ra. De bêrê haştiya tornê ecdadî rê tîvar bikerê!
En peyecoy na dewlet û hukumatê terorîstî Roboskî de 34 domonê kurdî qirkerdî. Dewleta tirkî hona hesavê na tertelî nêdo. De bê ke vaze “no hukumat meselan halkeno!”
Nika wistê ra onca halkerdena meselan ra qesey kenê. Ça niya kenê?
Verecoy naye vajîme: Hukumat û dewleta terorîstî wastenê 2012 de Hereketê Serbestiye yê Kurdan tasfiye bikerê. Nînan bi taybetiye par wisa ra tepiya tarva girse gurete. Gerîlla teqeta xo bi çalakiyanê girsan kerde eskera. Dewleta terorîste wastenê, fênda gerîlla jê fênda gerîllayanê Tamîl kero. No omidê xo hetê gerîlla ra tol ame vetene.
Heto bîn ra hereme gîrîna. Suriye de herbê zerrî, Iraq de pêrodayîsê zerrî estê. Halê Îran hora werte dero. Tekîliya Tirkiye nî 3 dugelan de zaf xiravin a. Pêroyîne de problemê xo estê.
Na het ra ke niyada, konjukturê mavênê miletan seweta Tirkiye rind nêaseno. Nato Tirkiye rê çiqas yardim keno bikero, eke dormê û zerrê Tirkiye de haştiye çîna, yardimê Nato Tirkiye nêxelesneno.
Zerrê Tirkiye de en muxalefeto girs Hereketê Serbestiye yê Kurdan o. Kurdî her het ra erzenê xover, çi beno bibo, teslîmê dewleta terorîste nêbenê. Na semed ra ewro qeseykerdene kerda rojdem. Zerre ra naye nêwazenê, mecbur mendê.
Qesê hukumat û dewleta terorîste rê tîvar nêbeno, gamî lazim yê.
Hama ma vîneme ke na dewlete qirkerdene de israr kena. Amed Lîce de qetil kerdena 10 gerîllayan misnena ma ke, na dewlete haştiye nêwazena. Onca na serra newiye de her roz operasyonê qirkerdena siyasî virajînê. Na zî raştiya na hukumat û dewleta terorîste kena zelal.
***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.