AKP ke biya serdest nêbiya, halkerdîsê mesela kurdî ra qesey kena. Qesey kena, la 12 serrî yo verva kurdan herb ramena. Zerrê nî 12 serran de AKP zaf qetlîamî virastî. Nî qetlîam ra jû kî Qetlîamê Roboskî yo. AKP hona hesabê na qetlîam kî nêdo. Mordem xora pers keno, aceba hukumat û dewleta niyanene de haştiye bena? Dewleta ke seweta Tertelê Qoçgîrî leborîna xo nêwazena, a dewlete de haştiye bena? Dewleta ke seweta Tertelê 1925 leborîna xo nêwazena, a dewlete de haştiye bena?
Dewleta ke seweta Tertelê Zîlan leborîna xo nêwazena, a dewlete de haştiye bena? Dewleta ke seweta Tertelê 38 leborîna xo nêwazena, a dewlete de haştiye bena? Dewleta ke seweta Qetlîamê Mereş leborîna xo nêwazena, a dewlete de haştiye bena? Dewleta ke seweta Qetlîamê Sêwaz leborîna xo nêwazena, a dewlete de haştiye bena? Dewleta ke sucdaranê Qetlîamê Roboskî nimnena, a dewlete de haştiye bena?
Dewleta ke vana “tek, tek, tek …” a dewlete de haştiye qeyta bena?
Dewleta ke birr sanena adirî ver vêsnena, a dewlete de haştiye bena?
Dewleta ke îdarekarê xo ermenî jê heqeret vînenê, a dewlete de haştiye bena? Dewleta ke poşt dana DAÎŞ, a dewlete de haştiye bena?
AKP nika na dewlete îdare kena, coka AKP de kî haştiye nêbena. Dewleta AKP 21 asma adare yê 2013 ra na het “demê haştiye” ra qesey kena. La na dem de kî gerîlla û sîvîlî 20 ra jede însanê kurdî hetê na dewleta AKP ra ameyî kistene. Eskeranê AKP 19ê na asme Lîce de bi name Mehdîn Taşkin onca jû genco kurd qetil kerd. Eskerê tirkî resmê ke riznayena peykerî ra tepiya ontî, kerdî vila, zip-zelal serranê herbê qilêrînî anê ma vîrî. Eskeranê tirkî payna sarê gerîllayanê şehîd dayenê û resmî ontene. Gosê gerîllayan cira kerdenê, sarê gerîllayan cira kerdenê, resmî ontenê, mordemanê xorê rusnenê. Serokwezîrê tirk Recep Tayyîp Erdogan 17ê tebaxe de peykerî Lîce ser vat: “çi ke lazim o, gune bêro kerdene.” Na vatîs ra 2 rojî tepiya Mehdîn Taşkin hetê quwetanê hukumatê AKP ra ame qetil kerdene.
19ê tebaxe kî Beşîr Atalay biyayîsê Lîce ser vat “çi ke lazim bî, ame kerdene,” Beşîr Atalay merdena gencanê kurdî rê beno sa. Famê hukumat û dewleta AKP yê haştiye na wo. Na semed ra kî mordem gune tedbîranê xo bijero. Haştiye heya, la ceremê haştiye gune teyna kurdî medê. Gorê mi, na dewleta faşîste de ne haştiye bena, ne kî piya ciwiyayîs.