Weçînayîşê pêronê yê 7’ê Hezîranê nêzdî beno. Bi nêzdîbîyayîşê weçînayîş ra xebatê şarê kurd yê Ewropa zî zêde beno.
Ez çend rojîya bajer bi bajer gerêna û xebatê şarê kurd yê weçînayîşê 7’ê Hezîrane taqîp kena. Şarê Kurd seba no weçînayîş zaf bi coş û bi moral xebat keno.
Nika ra pêronê bajarê Ewropa de dest bi xebat kerdo. Kombîyayîş ameyê viraştiş. Komîsyon ameyê ronayîş. Komîsyonê, mîyanê şarî de gerênê. Kam seba weçînayîş nuşte nîyo, înan ra yeno qiseykerdiş û şinê konsolosê tirkî de xo nusnenê.
Zobî herkes vano, ma seba weçînayîşê serokkomarî weş xebat nêkerdê. Ver nayê zî seba Selahaddîn Demîrtaşî zaf rayî nêvejîyayê. Netîce weçînayîşê serokkomarî seba ma şerm bi.
No halê de ma eynî xeletî û kemayî nêkenê. Ma nikara kar kenî. Hedefê ma zî girdo. Ma Ewropa de seba HDP’ê 400 hezar zêdeyîr rayan vejenî. No dereheqî de şarê kurd zaf bi qerar aseno.
Xo ra bajar bi bajar zî hedef esto.
Çend nimûne estî. Wexto ke ez bajarê Hamburg de bî, zafê şarê kurd hina qiseykerdenê.
Şarî ma vatenê: "Ma weçînayîşê Hamburg de yew serkewtişêk gird girewt. Cansu Ozdemîr bi rayê zaf bî parlamentara Hamburge. Tayê dostê Kurd zî bi rayanê şarê kurd yê Hamburge bîyê parlamenter.
Wereke ma yewe bîn zî seba parlamenterî nîşanbidenê. Mi hina bikerdenê o zî ameyenê weçînayîş.
Wexto ke ma ewnênê rayê şarê kurd yê ke seba weçînayîşê Hamburg ameyê şixulanayîş, seba weçînayîşê Kurdîstan û Anatolîya zî ma eşkenê serkewtişêk gird bivirazi”.
Heta şarê kurd yê Hambug vano ma weş kar bikeri ma eşkenê seba HDP’ê weçînayîşê 7’ê Hezîrane de 25 hezar rayan kombikeri.
Şarê Kurd yên ke Hamburgê ciwîyenê hina bi îddîa û qerarê.
Eynî coş û moral Berlîn de zî esto.
Berlîn de zî xebatêk erjayî dewamkeno. Xo ra peyêne heftê de Hemserokê HDP Selahaddîn Demîrtaş zî yeno Berlîn û seba weçînayîşê 7’ê Hezîrane beşdarê yew mîtîng û kombîyayîş beno.
Şarê Kurd yên ke Berlîn de ciwîyenê vanî: "Weçînayîşê serokkomarî de Berlîn de seba Selahaddîn Demîrtaş 1200 rayî vejîyayê. Nê rayî zaf tayî bî. Berlîn de en tayî 80 hezar Kurd ciwîyenî. Şarê bîn yên Kurdîstan û Anatolîa yê demokrat zî estî. Wexto ke ma nê pêronan hesab bikerê, gera seba HDP’ê en tayê 25 hezar rayî bivejîyenê”.
Nê her di bajaran de resmêk hina aseno, dîyara ke şarê kurd yê Ewropa ser weçînayîşê 7’ê Hezîrane tesîrêk gird bikero.