Cayê ke xebatê weçînayîşê 24ê Hezîrane tede yenî domnayîş ra 2ê ci bajarê ke zafaneyê ci kirmanc î, Çewlîg û Dêrsim î. Namzedê HDPyî yê Çewlîgî keye bi keye, dewe bi dewe gêrenî û şar eleqeyêko gird nîşanê namzedan dano. Bajarê Dêrsimî de zî şar mesajê weçînayîşê 24ê Hezîrane bi hawayo aşkere dano û vano ‘ma do her 2 parlamenteran zî bierşawî meclîs’.

Partîya Demokratîke ya Şaran (HDP) Kurdistan û Tirkîya de xeylê bajaranê cîya-cîyayan de xebatanê weçînayîşî kena. Nê cayê ke tede lez dîyayo xebatanê weçînayîşî ra 2ê ci bajarê ke zafaneyê ci kirmanc î, Çewlîg û Dêrsim î.

Bitaybetî xebatê weçînayîşî yê bajarê Çewlîgî her weçînayîşî ra zafêr bîyo û hedefê HDPyî tîya de raya xo bivejo 2 qatî. Namzedê HDPyî Erdal Aydemîr, Nîhat Aksoy û Şefîka Dogane bi rêxistina bajar û qezayan serê sibayî ra heta ereyîya şewe xebatan domnenî. Mîyanê roje esnaf û keyeyî yenî zîyaretkerdiş, aşma Remezanî ver programê fitarî yenî organîzekerdiş û sewbîna tewir bi tewir xebatî benî. Bajar de buroyê weçînayîşî yê HDPyî raştê eleqeyêko gird yenî.

Çewlîg de etirîyayîşo tewr gird ewleyîya sinodoqan o. HDPyî hewl danî no het de tayê tedbîran bigîrî. Heto bîn de qerarê Heyetê Weçînayîşî yê Berzî (YSK) yê kiriştişê sindoqan esto. Goreyê nê qerarî elewîyê ke cayê asêyan de cuyenî, do dewanê qoricîyan de ray bikar bîyarî.

Ma do peynîya AKPyî bîyarî

Namzedan ra Erdal Aydemîrî va ‘şarê Çewlîgî her wextî ra zafêr qerardar o ke problemê kurdî bi hawayo aştîye bêro çareserkerdiş’ û wina domna: “Cok ra destekêko gird danî ma. Ma seba destekanê înan sipas kenî. Xebatê ma keye bi keye domîyenî. Ma bawer î ke 24ê Hezîrane de peynîya dîktatorîye bîyarî. Aştîye û seyyewbînanîye do qezenç bikerî. Bitaybetî ciwanî destekê girdî danî. Ma do 24ê Hezîrane de îqtîdarê AKPyî bîyarî.”

Sewbîna şansê ma çin o

Namzedo bîn Nîhat Aksoy o û karê xo ra ameyo îxraçkerdiş. Aksoyî va ‘mi seba ke problemê kurdî bi hawayo demokratîke û aştîye çareser bibo, HDP weçêna’ û wina dewam kerd: “Ez seba ke hetê mazluman de ca bigîra, HDP ra bîya namzed. 30ê Gulane ra nata yo ke ez qezaya Kanîreşî de xebatan domnena. Ma dewe bi dewe, keye bi keye gêrenî. Şarê ma eleqeyêko gird nîşanê ma dano.”

Namzeda cinîye Şefîka Dogana zî dîyar kerde ke HDP partîya cinîyan a û wina va: “Çewlîgijî bi hawayo bîyaye nizdîyê ma benî. Înşala ma do heme hîrê namzedanê xo zî bierşawî Meclîs. Cinîyî eleqeyêko gird nîşanê mi danî. Tayê ci zî şaş manenî û vanî ‘cinîyêk senî bena parlamenter?’. Ma zî vanî ‘eke HDP bo beno’. Çimkî HDP partîya cinîyan o.”

Ma heta peynî hetê şima de yî

Bajarêko bîn ke tede xebatê weçînayîşî yenî domnayîş, Dêrsim o. Dêrsim de 2 parlamenterî do bêrî weçînayîş. Seke yeno zanayîş no bajar de 16 serrî yo ke AKP parlamenter nêveto û no weçînayîş de zî tewr zaf qala HDP û CHPyî yena kerdiş. Herçiqas ke heta nika fikrê ‘1 parlamenter HDP û 1 zî CHP ra vejîyeno’ hakim bi zî, nika îttîfaqê HDP û Federasyonê Meclîsê Sosyalîstan bihêz o. Dêrsim de extîyarê ke bi serran o raya xo danî CHP daxî, dîyar kenî ke rayîrê şîyayîşê AKPyî derbazbîyayîşê bendê weçînayîşî yê HDPyî reyde beno û vanî ‘ma do raya xo bidî HDP’. Cinîyêka extîyare wina vana: “Ma heta peynî hetê şima de yî. HDP kilîtê nê welatî yo. Heme berê ke ma ser o padîyayî, ancax bi HDP şêro meclîs, abenî. Seba ameyeyê welatî, ganî HDP meclîs de bibo.” Dêrsimijî vera kurdê ke ray danî AKP zî bireaksîyon î û na babete bi parlamenteran munaqeşe kenî. Dêrsimîjî mesajê xo bi hawayo aşkere danî: 24ê Hezîrane de do her di parlamenterî zî ma ra bibî.

 

MERKEZÊ XEBERAN