Verfekê HDP Ayhan Bîlgen, derheqê binçimgirewtişê parlamenteranê HDP de qisey kerd û vist vîrî ke eno prosesê referandumî de wazenê bi fîîlî gureyê înan vindarnê û HDP bê tesîr biternê.
Bado ke heqê destnêdayişê parlementeranê HDP ame wedarnayen, heta nika Hemserokê Pêroyî yê HDP Fîgen Yuksekdag û Selahattîn Demîrtaşî ra pîya 27 parlamenterê înan amey binçimgirewtiş û nînan ra 11 parlamenterî tepêşîyay. Bi hezaran endam û îdarekarê HDP û DBP amey tepiştiş. Verfekê HDP Ayhan Bîlgen ke 29'ê Çile de ame binçimgirewten û serbest ame veradayen derheqê zextanê vera HDP de qisey kerd.
Bîlgenî da zonayen ke tîrmeha 2015’î ra na het 9 hezar û 200 endam û îdarekarê înan amey binçim girewten. Heta nika 2 hezar û 902 kes amey tepiştiş. Kesê ke amey tepiştiş vêşêrê ci hemserokê rêxistinê sûk û yê qezayan ê.
5 hezar binçim girewtişî
Bado ke meclîsî vernîyaza AKP û MHP qebul kerd, dûştê parlamenteranê HDP operasyonê binçimgirewtişî destpa kerd. Operasyonanê 6 aşmanê peynî yê dûştê HDP de 4 hezar û 966 kes kes amey binçim girewtiş. Nînan ra hezar û 478 kes tepêşîyay. Nînan ra 11ê ci parlamenterê HDP, 35ê ci hemserokê sûkan, 97 hemserokên qezayan ê. Hona zî 26 hemserokê sûkan, 82 hemserokê sûkan qezayan, hemserokê sûkekê, 3 endamê MYK, 4 endamê Meclîsa Partî, û 750 endam û îdarekarê sûk û qezayan tepişteyê. Kesê ke serbest viradîyenê zî bi şertê qontrola edlî viradîyenê.
Şar wayîrê partîya xo vejyeno
Verfekê HDP Ayhan Bîlgen ke derheqê babed de qisey kerd da zonayen ke wazenê no prosesî de partîya înan bê tesîr viradê. Bîlgenî vist vîrî ke rexmê pêrokîn zextan gureyê înan ramenê û qiseyanê xo wina ramit: “HDP seba şarî wayîrê îdîayek e. HDP, partîya şarî ya û şar wayîrê partîya xo vejyeno. No tecrubeyê demokrasî yo. Bê guman no proseso ke weçîniteyê şarî yenê tepiştiş û rîwalê manîkerdişan nêşkenê bixebtê, şar do hurendîya weçîniteyan de gureyê referandumî biramo. Şar gureyanê weçîniteyanê xo erdî de nêterneno. Dê hona vêşêr wayîr bivejyê û gureyê referandumî biramnê.”
Wazenê HDP bê tesîr bikerê
Bîlgenî aşkere kerd ke girotişê endam, îdarekar û wekîlanê înan no prosesê referandumî de leteyê (parçe) kampanya "E" yo. Ayhan Bîlgenî vist vîrî ke wazenê no prosesî de HDP bê tesîr bikerê û qiseyanê xo bi nê vatenan qedêna: “Bi nê girotiş û binçim girewtişan wazenê îradeyê ma bişikînê. Gênê binçiman û serbest veradanê. Zey ke litûfeke û rindekî mînet kenê, damûsnenê. Wazenê bi hawayêko fîîlî gureyê ma vindarnê. Çi beno wa bibo, serbest veradayişê ma û embazanê ma litûfeke nîyo. Kamcî merhaleyî de hêrişî yenê wa bîrê, tekoşîna ma ya heqdar do dewam bikero.
ENQERE