Konseptê îmhakerdişî
Yildirimî va ‘seba ke HDP polîtîkayanê AKPyî ver de muxalefetî kerda, bîya hedef’ û qiseykerdişê xo wina domna: “No yew serre û nîm o ke îqtîdarê AKPyî vera hetê muxalefetî de konseptê tasfîye û îmhakerdişî visto dewre. Çarçeweya nê konseptî de çapemenîye ra bigîrî heta akademîsyenan, partîyê sîyasîyan ra bigîrî heta komeleyanê sîvîlan her hetê demokratîkî bîyî hedef. 15ê temuze ra dima yew bloka faşîst ke tede CHP zî ca gêna ameya awankerdiş û seba ke tena yew hêzo ke muxalefetî keno partîya ma ya, partîya ma bîya hedef.”
Paştîdayîşî bes nîyê
Yildirimî dewamê qiseykerdişê xo de bale ant piştîdayîşanê seba HDPyî û wina va: “Nê piştîdayîşî muhîm î la qîm nêkenî. Tirkîya ewro çîyê ke welat de qewimîyênî ver, her roja ke şona heqê merdiman ra dûr kewena û hetê sîyasî, ekonomî û kulturî de zî despot bena. Nê semedî ra hêrişî tena vera partîya ma de nînî kerdiş, coka piştîdayîşê ke ameyî muhîm î, la bes nîyî. Partîya ma seba Tirkîyaye yew şans a. Eke na qaleya peyên zî bêro vînîkerdiş, o wext hem dewletê Ewropaye û hem zî yê bînî zaf çîyan vînî bikerî. Ganî wayîrvejîyayîş hîna bihêz bibo.”
Estena ma muhîm a
Yildirimî qiseykerdişê xo de va ‘Ma do seba qerarê mabênî roja sêşeme îzehetêk bidî’ û qiseykerdişê xo wina domna: “Eke ma meclîs de nêbî serê zaf çîyan yeno padayîş. Mesele di roje verê qanûnê tecawizî bi hîle meclîsî ra vîyarnayî û kerdî qanûn. Ma wexto ke 6ê teşrîna peyêne de faalîyetanê xo yê meclîsî vindarna, ma o wext zî vatbî ke ‘ma do seba qeraro peyên, şar û rêxistinanê sîvîlan reyde têkilî de bibî.’ Ewro zafaneyê nê komele û rêxistinê sîvîlan nêwazenî ke ma xo meclîs ra biancî û wazenî ke ma meclîs de bimanî. Ma do roja dişeme kombîyayîşêko çapemenîye rê padaye bivirazî û qerarê xo yê mabênî bigîrî û roja sêşeme zî aşkere bikerî.”
Ganî ma vera nînan de bivinderî
Yildirimî qiseykerdişê xo de vengdayîşê wayîrvejîyayîşê demokrasîye kerd û qiseykerdişê xo wina qedêna: “Ma do nika ra pey programê xo, rayîr û raybazanê xo bi kombîyayîşanê şarê xo reyde dîyar bikerî. Ma nika ‘hîna zafêr ma senî eşkenî têkoşînê xo ortax bikerî’ ser o fikiryenî. Nika hetê demokratîkan ra waştişê ma no yo ke wa hîna zafêr wayîrê HDPyî bivejyî û wa hîna zafêr xover biderî.”
MELEK YUKSEL
ANF /AMED