HDP startê mitînganê referandûmî ver Girotxaneyê Edîrne û ke Hemserokê HDP Demîrtaş mîyan de tepişteyo de da. Rîwalo ke damûstayîna ver Girotxaneyê Kandira ke Hemseroka HDP Fîgen Yuksekdag mîyan de tepiştîya, hetê walitî ame manîkerdiş, banê HDP yê Kocaelî de kombîyayîşê çapemenî virazîya.
Damûstayîna Girotxaneyê Edîrne ke Hemserokê HDP Selahattîn Demîrtaş tepişte yo de panqarta ‘Ma dê teqez serbikewê’ abîya. Seroka pêroyî yê ESP Çîçek Otlu ke tîya de qisey kerd û va, ‘Senî ke ma bi wekîlanê xo Adare de qezenç kerd, ma dê 16ê Nîsane de zî teqez qezenc bikerê. Yardimkara Hemserokanê HDP Serpîl Kemalbay zî vist vîrî ke xebatê referandûmî ke seba şaranê Tirkîye krîtîk ê destpa kerdî û aşkere kerd ke ê merhaleyêko qerardayîşê ko muhîm de yê.
Xebatê adîlane û têdûştî çin ê
Serokwekîla Meclîsî Pervîn Bûldan’î zî hayr ant sebebê ver girotxaneyan de startdayîşê xebatanê xo û wina va: “Serokê partîyanê bînî seba kampanya û propagandayê weçîntayîşî, bi rehatî meydanan de xebatanê xo danê ramiten. Ma, proseso ke Serok û wekîlê ma rehîn ameyê girewtiş de gureyînanê xo ramenê. No adîlane û têdûşt nîyo.”
Bûldan vist vîrî ke 16ê Nîsane firsetekê tarîxî yo û bi nê vatenan veng da şaranê Roman, Pomak, Kurd, Elevi û Tirk yê ke Edîrne de cuwîyenê: “Seba Tirkîyeyê ka bi quwet û roşn tercîxê xo hetê ’Nê’ bikerê.! Rixmê hendayî zext û zorvajîyan, 16ê Nîsane de ma dê nameyê ‘Nê’yî bi herfanê zêrîn binusnê.” Tewr peynî de Bûldan vengdayîşê serbestveradayîşê wekîlanê tepişteyî kerd.
Damûstayîn ra dima, heyetê HDP Edîrne de dezgehan zîyaret kerd.
Kandira de Walitî destûr nêda
Damûstayîno ke ame plankerden ver Girotxaneyê Kandira ke Hemseroka HDP Fîgen Yuksekdag mîyan de tepiştîya, hetê walitî ame manîkerdiş. Ser nayî banê HDP yê Kocaelî de kombîyayîşê çapemenî virazîya.
Kombîyayîşî de ewil Endama Desteya Rayverînê Meclîsî yê HDP Gulsum Agaoglû qisey kerd û manîkerdişê walitî rê nêrazîbîyayîş damûsna. Agaoglû vist vîrî ke rehîngirewtişê Hemserok û weçîntoxanê HDP seba şikitişê îradeyê HDP bî. Gulsum Agaoglû aşkere kerd ke nê kerdenî vera temsîlîyetê cinîyan ê û va, ‘ma qeraranê dewlet nêsilasnenê’.
Vengdayîşê seferberî
Dima ra Parlementerê HDP yê Stenbolî Garo Paylan’î qisey kerd û wina va: “Bi hezaran wezîfedaran hewl dayişê manîkerdişê ma, tersê înan damûsneno.Iyê dê nêeşkîye qise, veng û îradeyê ma bibirnê. Ma dê ewro ra tepya bidê musnayîş ke ‘Nê’ çi qe bi quwet o.” Paylan’î vengdayîşê seferberî da şaranê Tirkîye û va, ‘Bêrê ma vajê ‘Nê’ ke wa reyna cesaret nêkerê ke enê kerdenanê antî demokratîkî virazê. Sîyaset de do dewran açarnîyo. Bêrê ma bi rihê seferberî kampanya ‘Nê’ de biresê pê.
EDÎRNE/KOCAELÎ