Partiya Demokratîk ê Şaran (HDP), tecrîda ser Rayverê Şarê Kurd Abdullah Ocalanî vist rojdemê Meclîsê Tirkîya.
HDP derheqê babed de vernîyaz persekê pêşkeş kerd û tecrîda ser Ocalanî vist vîrî û va, “Birêz Ocalan, ke seba çarekerdişê meseleya Kurd bi rengê haştîyane hewl dano, 27'ê Tîrmeha 2011î ra na het nêşkeno bi pawitoxanê xo bivîno, 11'ê Îlona 2016’î ra na het zî nêşkeno keyeyê xo ra pêdîyayîş virazo.
27'ê Tîrmeha 2011’î ra na het pêdîyayîşî yenê manîkerdiş
Vernîyaz persê HDP de Serokwezîrê Tirk Bînalî Yildirimî ra ame waşten, ke cewabê nê persan bido:
* Hikumeta şima qadê neteweyî û mîyanneteweyî de timî vana, Komara Tirkîya dewletêka hiqûqî ya. Eke wina bo; heqê ke seba pêrokîn tepişte û hikumweran vîyarenê, çima seba Birêz Abdûllah Ocalanî nêvîyarenê?
* Birêz Abdullah Ocalan, ke mîsyona ci ya ser sîyaseta kurd hetê her kesî yena qebulkerdiş, ageyraya kamiyeke civakî. Seba Girotxaneyê Îmrali ke Birêz Ocalan mîyan de tepişteyo, seba ke statuyê taybet bîro vetiş û goreyê prensîbanê hiqûqa unîversal newede ra bîro sereraştkerdiş, qe hewildan û karekê hikumeta şima esto? Planeke bi na rengî yê hikumeta şima esta?
Behaneyê dûrê aqilî
* Xeyrê behaneyanê 'rewşa nêbaş ê hewayî’ û ‘kelek xiravîna’ ke zey behaneyê dûrê aqilîyê, bi kamcî sebeban 27'ê Tîrmeha 2011’î ra na het pêdîyayîşê pawitoxan û 11'ê Îlona 2016’î ra na het zî pêdîyayîşê bi keyeyî yenê astengkerdiş?
* Rixmo ke xeylê reyî serpirodayîşî amey kerdiş, çima pêdîyayîşê Birêz Ocalan bi keye, wasî û pawitoxan ra yeno manîkerdiş?
* Pêrokîn heqanê tepişte û hikûmweran ra bêpar veradayîşê Birêz Ocalan gelo tewrêko cezakerdişî û sîyasî yo?
* Tecrîdo giran ke dûştê hiqûqa neteweyî û unîversal o, bi kamcîn sebebanê hiqûqî yeno ramiten? No tecrîdo giran ke behsê ci beno, hikumeta şima ya ke îdîa kena ke dewletêka hiqûqî ya, goreyê kamcîn kiştê hiqûqî yeno ramiten?
* Girava Îmrali hetê kamî û kamcîn statuyê qanûnî ra yena îdarekerdiş?
ANF/ANQARA