Serokê Federasyonê Alewî Bektaşî ke kongreyê peynî de reyna ame weçînayen Bakî Duzgun’î aşkere kerd ke serdema newî de hedefê sifte yê Hereketê Alewîyan dûştê her şiklê asîmîlasyonî de berzkerdişê tekoşîn o. Duzgûn’î vist vîrî ke zey ABF hedefê înan o esasî zî  ronayişê ‘Cepheyê Demokrasî’ yo û hayr ant muhîmîya xeta tekoşîn yê hometa alewî û şarê kurd ser. 

Federasyonê banî yê alewîyan ABF ke serra 2002 de ronîya û 200 ra jêde rêxistin û sazgehî girêdayê ci yê Roja Yewşeme Kongreyê xo yê 8. viraşt. Pîrê Alewî Bakî Duzgun ke jû serr û nîm o Serokîna ABF keno, no dewr de zî ame weçînayen. Duzgun’î derheqê dewra newî yê tekoşîna alewîyan de mesajê muhîm day. 


Dûştê herb xeta tekoşîn 

Bakî Duzgun’î da vist vîrî ke ABF aşma Temmûz yê 2015î ra na het dûştê konseptê herbî bi waştena ‘haştî’ xeta tekoşîn vet werte û zonayen ke neyra tepya zî dûştê polîtîkayanê faşîzan yê Seray Hereketê Alewî do xeta tekoşîneke bi program û sîstematîk esas bigîro. 

Duzgun’î aşkere kerd ke Seray wazena şaran bîyaro pêver, polîtîkayê cîyakerdiş û tirkkerdişî esas gêna û qiseyê xo hina dewam kerd: “Jû hetî ra kurdan qetil kenê, heta bîn ra serva asîmîlekerdişê alewîyan hadreyînan kenê. Gurgum, Koçgîrî, Dersim de wazenê qampê pênaberan ronê. La gunê nayî kî bizanê ke kurdî û alewî tarîx de qet teslîm nêamey girewten. Ma zaf qetlîam û zilim dî la ma xo her tim ganî girot û resna rojanê ewroyî.”


‘Waştena ma şoreşa demokratîk a’

Serokê Federasyonê Alewî Bektaşî Bakî Duzgun’î da zonayen ke tekoşîna dûştê polîtîkayanê asîmîlasyonî ke bi destê Serokîna Karê Dîyanet ferzê hometî kenê hedefê esasî ya û wina dewam kerd: “Kamîya tirk û bawerîya sunnî hetê AKP-Seray zey raybazê îxtidar yenê şixulnayen. Waştena ma na wa ke herkes eve îtiqatê xo weşî bikero. Îtiqat mavêna însan û Haq’î der o. La îxtidar ewro îtiqatan û kamîyan dana pêver. Serva ramitişê îxtidara xo şansekê bîn nêvînena. Pêrokîn bawerî û kamî ganî bişerê pîya bê. Serva nayî kî hewceyê hemwelatijîya têdûşt, mutabaqat û makeqanûna wertex esto. Waştena ma ya hemwelatijîya têdûşt şoreşa demokratîk a. Ca ardişê nayî zehmet o, la rixmê her çî ma êşkenê demokrasî û azadî bîyarê welatê xo.” 


Pêresnayişê çormeyanê demokratîk 

Bakî Duzgun’î da zonayen ke qonaxê newî yê tekoşîn de hedefê esasî yê ABF ronayişê ‘Cepheyê Demokrasî’ yo. Serokê ABF vist vîrî ke Tirkîye de meseleyê zey kar, nan, feqîrtî û ciwiyayişê estê û serva çarekerdişê nê meseleyan pêşnîyarê xo ardî ser zon: “No welatî de cîyabîyenî nêciwyenê. Nayî ra endî ganî pêrokîn çormeyê demokratîk bîrê têlewe û cepheyê wertex de biresê pê. Çiyê ke dewrê 12ê Îlonî de qewimyayî ma rê na hewcedarî rind damûsna. Eke o wext herkes amebîyaybî têlewe faşîzm do hendayî berz nêbîyaybi, hendayî însanî dê nêameyaybî qetilkerden. Ewro zî faşîzm berzê merhaleyekê tewr berzêr bîyo. Endî ganî ma xo û dinyayê xo yê qijkek (werdî) de israr nîkerê. Eksê nayî ganî ma Cepheyê Demokratîk de biresê pê û tekoşîn gird bikerê. Ma zey ABF hadreyê ke morê xo bierzê cepheyekê hinayî.”

Bakî Duzgun’î hayr ant mîsyonê pêrokîn çormeyanê demokratîk ser û wina va: “No pêvacoyekê tarîxî yo. Wexto ke ma 12ê Îlon mahkeme kenê, rolê kesê ke serva azadîyan nêameyî têlewe zî esto. Gune ewro hina nêbo. Ganî ders bîro vejyayen û tekoşîn bîro hera kerden. Împaratorîyeke tersî ronîya ya. Tenya jû raya şikitişê nayî quwetbîyîna. Endî ma mecbûrê ke serva haştî, demokrasî û azadîyan bîrê têlewe. Ganî bi rêxistinbîyen cewab biderime polîtîkayanê çinîkerdişî.”


Wertaxîya kurdan û alewîyan

Serokê ABF Bakî Duzgun’î aşkere kerd ke alewî û kurdî nika hedefê îxtidara sîyasî de yê û hayr ant hewcedarîyê pîya tekoşînkerdişê alewî û kurdan ser: “Na dewlet her tim alewîyan rê va ‘kurdî şafîyê, nê şima qir kenê’. La ma dî ke yê ke alewîyan qir kenê dewlet bi xo ya. Nika zî ‘kurdê ke leyê dewlet de yê rindê, yê ke tekoşîn kenê xiravîn ê. Alewîyê Qizilbaşî îsyankarîyê, Bektaşî hetkarê dewlet’ ê. Nê vatenî goreyê polîtîkaya ‘lete bike û îdare bike’ yê. Şarê mazlûmî her tim hetê sîstema serdest ameyê letekerden. Dûştê nayî tekoşîn şert o. 1938î ra 2015î no welatî de kurdî û alewî mezeleyan de resayê pê. Ma mezelxaneyan de resenê pê, çayê ma ciwîyayişî de nêresê pê?”  

Bakî Duzgun’î vist vîrî ke înan serva merasîma 23. serragêra vîrardişê Qetlîama Sêwas (2ê Temmûz 1993) serpirodayiş kerd û da zonayen ke Wezîrê Edalet Bekîr Bozdag’î cewabê ‘Tarîxê ma de veşnayişê însanan çîno’ dayo. Duzgun’î va ‘Madimak de veşnay, ewro zî Cizîr de veşnay. 

Bakî Duzgun’î aşkere kerd ke ê her serr 2ê Temmûz de Sêwas de bî û vist vîrî ke îye dê emserr 3ê Hezîran de Gurgum (Mereş) de bê, ewja de Cem bigîrê, peycoy şirê Sêwas û qurbanîyan bîyarê vîrî, ewja ra zî şirê Sûr. 

Serokê ABF Duzgun’î herkesî ke tewrê pêrokîn nûmayiş û aktivîteyanê înan bibê.   


 DÎHA/ENQERA