Wexto ke ya ewil teqyay, ma nêwaşt ke bombeya raştikên bîyerî vîrê xo, labelê wexto ke ya dîyin teqyay, ma fam kerd ke hedîse xeylê muhîm o. Ez û çend embazê xo yê xebatkarê weşîye ma hetê hedîseye ra vazday. Labelê ma ra ver polîsî şîy weyra. No zî şarî xeylê hêrs kerd. Ma waşt ke hetkarî bidî embazanê xo, labelê polîsan mudaxaleya şarî kerd.”
Kayê lêminî
Karakuş dergeyîya qalîkerdişê xo de dîyar kerd ke wexto ke ma dîy ke laşê merdimî parçe bîbî, ma nêşîna çîyek bifikirî û wina verdewam kerd: “PKK heman roje îzehetê bêçalakîtî daybî. Tayînan bi nêy hêrişî waştî ke no bira bêçalakîtî sabote bikerî. Verîya nika tayînan vatbî ke ma do zaf gonî birijnî û rijnay zî. Pey nêy hêrişan de xora AKPe esta. Îdarekarî her tim wextê mîtîngan de nêverdaynê mîlçik bifiro, labelê aye roj ti tedbîrê asayîşî nêamebi girewtiş.”
Karakuş tewr peynî wina vat: “Derheqê qirkerdişê Pirsûsî de zaf çî amey vatiş, labelê derheqê kiştoxan de çîyek nêame vatiş. No zî do wina bibo; rayna do di hebî qurbanî biveynî û heme çî bierzî înan ser. Tena rayîrekî esto ke merdim bivîyaro vernîya mergan, o zî aştî yo. No semedî ra êy ke aştîye bîyarî no welatî êy ke yenî qirkerdiş î, yanî ma yî.”