Wezaretîya Perwerdeyo Milî 14ê çileyî de bedilnayîşê mufredatê perwerdeyî aşkere kerde. Vera nê bedilnayîşî de hetanê cîya-cîyayan ra reaksîyonî ameyî/yenî. Babete ser o Hemserekê Komeleya Elewîyê Demokratîke (DAD) yê Şûbeya Edene Zeynel Keteyî qisey kerd.Keteyî va ‘AKPyî heta nika xeylê reyan mufredat de bedilnayîşan kerdo û nika ma programê mufredatî yo îdeolojîk reyde rî bi rî yî’ û wina domna: “No bedilnayîşê mufredatî îdeolojîyê rastikên yê AKPyî nîşan dano. Bi nê bedilnayîşî wazenî zîhnîyeto tekperest bidî awankerdiş, cok ra verê xo danî mekteban.”
Neslo rikdar resnenî
Keteyî dewamê qiseykerdişê xo de va ‘Seba ke kesî sey makîne bi hawayo mekanîk biresnî, yenî perwerdekerdiş. Hedefê îqtîdarî o yo ke neslêko rikdar, bêtehamul û muhafazar biresno. Eynî wextî de îqtîdar wazeno hetê demokratîkî ke mîyanê îslamîyetî de estî, orte ra wedarno. Çimkî çîyêko yeno waştiş Îslamo îqtîdar o. Tîya de muhendîsîya komelkî esta. Mektebî bîyî merkezê awankerdişê polîtîkî. Sey fabrîkaya ke komelêko homojen xelq bikera, xizmetê çîyêko winasî kenî.”
Ewro zî yenî cuyayîş
Keteyî peynîya qiseykerdişê xo de wina va: “Nika hewl danî sîstemê perwerdeyo têmîyanî wedarnî. Bi mufredato newe wazenî îdeolojîyê neosmanî bêro awankerdiş. Mîyanê nê mufredatî de elewî û sewbîna cîyayî çin î. Çinêbîyayîşê ma bi AKP dest pênêkerd. No problemêko sîstemî yo. Ganî herême ra dest bi awankerdişê modelê perwerdeyî yê demokratîke bêro rêxistinekerdiş. Reyna ganî hêzê serdest yê îqtîdarî xo ma ser de nêdo ferzkerdiş.”
DÎHABER/EDENE