Roja 31ê Gulane saetê berey yê şanî de qezayê Qilaban ê Şirnexî de helîkoptêreke artêşa Tirk gina war û xeylê ci fermandar 13 lejkerî merdî. Mîyanê 13 kesan de Tumgeneral Aydogan Aydin o ke operasyonê herêma Kato koordîne kerd zî estbi.
Helîkopter o ke sûkeka Sêgirkê ke girêdayê Qilaban a, qerargehê lejkerî ra werzîya, badê wextekê kilm gina war. 13 fermandar û lejkerê ke helîkopterî mîyan de bî merdî. Kesê ke merdî ra yewe zî Fermandarê Tumenê Sînor ê Jendermeyan ê Şirnexî Tumgeneral Aydogan Aydin o. Aydinî wextekê Fermandarîya Tugaya Komando ê Qeyserî zî kerdo. Herzewbîn Aydinî operasyona 18’ê Nîsane ya ke herêma Koyanê Kato ê Elkê de destpa kerd rê fermandarî kerd.
Bi tekmîlê cî yê peynî
Tumgeneral Aydogan Aydinî 28’ê Gulane de, wexto ke Wezîrê Karê Zerrî ê Tirk Suleyman Soylû şibi Kato embazî pê ra kerd, telefonê Erdoganî kerd û ci rê tekmîl dabi. O tekmîl bi tekmîlê peynî yê Aydinî.
Herzewbîn mîyanê 13 kesan de serheng Oguzhan Kuçukdemîr, serheng Gokhan Peker, serpel Songul Yakut, Serdar Koray Onay, serpel Ilker Acar, serpel Nurî Şener zî estê.
7 cenaze rişîyay Anqara
13 cenazeyan ra 7ê ci rişîyay sûkanê ci û 6 cenazeyê ke mîyanê ci de cenazeya Aydogan Aydinî zî esta, rîwalo ke nînê silasnayîş seba teşhîskerdişê kamîye rişîyay Sazgeha Tiba Edlî yê Enqera.
ANF/AMED