Qezaya Cizîrî ya Şirnexî de 7ê teşrîna verêna 2014î de wexto ke seba prostestokerdişê hêrişê Kobanê ameyêne kerdiş, Hayrî Malgazo 17 serreyî, birayê ci Ahmet Malgaz û xalê înan Bahattîn Malgaz şîyênê nêweşxane. Wextê şîyayîşî de heme hîrê kesî zî hetê polîsan ra ameybî tepiştiş û raştê îşkenceyê polîsan ameybî.
Merdimanê Malgazî polîsanê îşkencekaran gerre kerdbîy. Labelê bi îdîaya ‘delîlî qîm nêkenî’ gerreyê înan bihawayo bênetîce mend. La derheqê Malgazî de bi mehneyanê cîya-cîyayan dozî abîy. Heyetê Mehkemeya Cezaya Girane ya 1. ya Cizîrî pêro pîya 5 serrî, 1 aşme û 20 rojî ceza da Hayrî Malgazî û seba ke emrê ci 18 ra şenik bî, cezaya ci taloq kerd. Ahmet Malgaz û Bahattîn Malgaz zî beraat kerd.
Pay sereyê mi nayî
Hayrî Malgazî mehkeme de va ‘wexto ke ma kaykerdişê gude ra ameyênê, kerra sereyê mi ginaye’ û wina dewam kerd: “Birayê mi û xalê mi waştî mi bîşêrî nêweşxane. Polîsan bi gulereşanayîşî wesayîtê ma vindarnayî. Polîsan pay sereyê min o şikate nayî. Dima ra ma berdî emnîyet û ewja de zî ma derb kerdî.”
Bahattîn Malgazî zî va ‘tepişîyayîşî ra 3 saetî dima ma berdî nêweşxane’ û wina domna: “Polîsî morê doktorî girewt û raporî bi xo mor kerd. Ez veradîyayîşê xo ra dima şîya nêweşxane û mi rapor girewt.”
Avûkate Fîlîz Olmeze zî babete ser o va ‘her çiqas ke ma dîmenê kaykerdişê gude waşt, labelê nê dîmenî nêdekewtî mîyanê doze’ û wina dewam kerde: “Polîsan rê ceza nêdîya, labelê Hayrî her çiqas ke mexdur bî zî ceza dîya ci. Bêedaletîya huqûqî tîya ra yena famkerdiş.”
DİHABER/ŞIRNEX