19ê teşrîna verêne de taxa Çalî ya Sêrtî de wesayîtêko zirxin daybî Felek Batura 6 serreyî ro û netîceyê pirodayîşî de Bature ameybî qetilkerdiş û Ayşeya 7 serreyî mergî ra xelisîyaybî.Şahidê hedîseyî dîyar kerdî ke wesayîto zirxin bi hawayo zaf lez hetê domanan ra vîyarto û domanan wesayît ferq nêkerdî. Şahidan ard ziwan ke Feleke binê tekera peyêne de menda û pelçiqîyaya. Wexto ke taxijî seba ke Feleke bixelisnî şîyî ser de ra dima wesayît vindeto. Taxijî vanî ke wesayîtê zirxinî taxan de zaf lez gêrenî.
Babete ser o pîyê Feleke Cemal Batur va ‘ma polîsê ke bîyî sebebê mergê Feleke reyde munaqeşe kerd’ û qiseykerdişê xo wina domna: “Wexto ke ma reaksîyon nîşanê polîsan da, polîsan ma ra va ‘çira domanê şima vejîyenî teber?’. Verê 6 domanê mi estbî, labelê nika 5 domanê mi mendî. Ma edalet wazenî. Wa edalet bêro ke êdî domanî binê wesayîtanê zirxinan de nêmirî. Fotografêkî kênaya mi daxî çinêbî. Telefonê mi daxî çinêbî ke mi fotografê kênaya xo biantêne. Emnîyet de wexto ke dîmenî nîşanê mi dayî, mi ra vatî wesayît bi lezîya 28 kîlometre şîyêne. Wexto ke mi reaksîyon nîşan da, polîsan mi ra va ‘çira şima verê cû ma hişyar nêkerd?’.” Walî wazeno serê hedîseyî pado
Keyeyê Baturî ra keso ke seba ewleyîye nêwaşt nameyê xo bido, wina va: “Badê ke tazîye ronîya, Walîyê Sêrtî Alî Fuat Atîk û Mudurê Emnîyetî ameyî zîyaretê tazîye. Walîyî ewja de dîyar kerd ke şofêrê wesayîtî tepişte yo û ê paweyê netîceyê tehqîqatî yî. Walî keye ra waşt ke wa keye gerre nêkero, ê do tazmînat bidî înan.”
MA/SÊRT