Partîya Demokratîke ya Şaran (HDP) vera xespkerdişê şaredarîyanê Amed, Wan û Mêrdînî bi tewrbîyayîşê hemserekê Pêroyî yê HDPyî Sazaî Temellî, parlamenter û heme hemşaredaran eşkerayîyêk organîze kerde.
Eşkerayîye ra ver polîsan rayîrê ke vejîyenê şaredarîye girewtî û şaredarîye û dormeyê ci girewtî binê abluqa. Yenîşehîr de polîsan hêrişê şarî kerd. Destûr nêdîya welatîyan ke welatî derbazê cayê çalakîye bibî. Polîsan bi TOMAyan hêrişê şarî kerd û netîceyê hêrişan de ame musayene ke Parlamenterê HDPyî Ayşe Acar Başarane û Feleknas Uca birîndar bîyî û neqlê nêweşxaneyî bîyî.
Bi siloganê ‘ma do bi xoverdayîşî qezenç bikerî’ îzehetêk dîya çapemenîye. Temellîyî çalakîye de qisey kerd û wina va: “Heme ca de veng bivejê û cuye bivindarnê. Têkoşînê ma yê huqûq û edaletî yo. Wayîrê îrade û ameyoxê xo bivejîyênê. Ma sey vizêrî, ewro zî rasteyan de yî. Ma do faşîzmî birijnî û welatî azade bikerî. Ma do tesilî qezenç bikerî.”
Wesayîtê ke bajaranê bînan ra seba tewrbîyayîşê çalakîyan yenî, vernîya înan yena girewtene û destûr nêdîyeno ke bikewî bajar.
AMED
Ma na derbe qebul nêkenî
Şaredarîyanê Amed, Wan û Mêrdînî rê reya dîyine qayûmî ameyî tayînkerdene û vera xespkerdişê şaredarîyan de reaksîyonî her ke şono hîra benî. Nê reaksîyonan ra yew zî Dêrsim de virazîya. Bi seyan kesê ke Rasteyê Seyîd Rizayî de ameyî têhet, îzehet da çapemenîye.
Serekê Şaredarîya Dêrsimî Fatîh Maçoglu, Endamê Meclîsê Partî yê HDPYî Ferhat Yildiz zî tede xeylê kesan cayê xo girewt. Serekê Şûbeyê Dêrsimî yê Komeleya Heqanê Merdiman Gurbuz Solmazî qisey kerd. Gurbuzî dîyar kerd ke 2016 de zî dest ser nîyabi şaredarîyanê HDPyî ser û wina domna: “Çi heyf ke ewro reyna îradeya şarî ameye xespkerdene. Na nêyî qebul nêkenî. Wa embazê ma serbest bêrî veradayene.”
Hemserekê HDPyî yê bajarî Hidir Çîçekî zî tepiştişan da vîrî û wina va: “Nizdîyê 400 merdimî ameyî tepiştene û nînan ra 7 kesî zî Dêrsim de tepişîyayî. Îqtîdar tersê vejîyayîşê raştîyan ra qayûmî tayîn kerdî. Ti meşrûîyetê îqtîdarê AKP û MHPyî nêmendo. Ma wazenî kesê wayîrwijdanî wa vera na neheqîye de bivinderî.”
Çalakîye de pankarto ke ser o ‘Ma derbeya ke vera îradeya şarî de ameya kerdene, qebul nêkenî’ amebî akerdene, bi çepikan qedîyaye.
PÎRHA/DÊRSIM