Kongreya Komelê Demokratîk (KCD) 25 bajaranê herême de bi beşdarbîyayîşê nizdîyê 800 rêxistinanê dezgeyê sîvîlan mabênê 26 û 28ê teşrîna verêna 2007î de Amed de ameye awankerdiş.
Bin banê KCDyî de parlamenteran ra bigîre heta hemşaredar, endamê meclîsê yê pêroyî, partîyê sîyasî, rêxistinê sîvîlî, temsîlkarê mezheb, dîn û roşnvîr zî tede xeylê beşê komelî ca gênî. 101 kesî endamê Meclîso Daîmî, 21 kesî mîyanê koordînasyonî de, 5 endamê Hemserekîya Dîwanî, 3 verfekî û 2 hemserek pêro pîya 850 kesî bin banê KCDyî de ca girewtêne. Dima ra bedilîyayîş virazîya û nika 500 delegeyî ca gênî û nînan ra 15 kesî endamê Meclîso Daîmî yî. Reyna bin banê KCDyî de Komîsyonê Huqûq û Heqê Merdiman, Ekolojî û Îdareyê Herême, Ekonomî, Xebatê Komelkî, Perwerde û Ziwan, Seyyewbînanîya Cinî-Camêrdî, Cinî, Ciwan, Bawerî, Karê Teber û Dîplomasî, Weşî pêro pîya 13 komîsyonî estî.
KCDyî sere de seba çareserîya problemê kurd û derheqê heme probleman de xebat meşnayêne. Serdozgerîya Amedî derheqê KCDyî de doze akerde û heme xebatanê KCDyî kerde babeta dadgehe. Heta nika no het de xeylê endam, hemserek û sewbîna ameyî tepiştiş.
Babete ser o Hemsereka KCDyî Leyla Guvene qisey kerde. Guvene va ‘KCD seba çareserîya problemanê şarî ameyo awankerdiş’ û wina dewam kerde: “KCD xebatanê xo bi hawayo demokratîk û qanûnî meşneno.”
Do poşman bibî
Guvene dewamê qiseykerdişê xo de va ‘KCDyî heta nika xebatê bierj meşnayo û hetê dewlete ra sey muxatab ameyo girewtiş’ û wina dewam kerde: “Endamê Heyetê Îmrali Hatîp Dîcle bi pêşnîyazê birêz Ocalanî çarçewaya malumatê dewlete de şîbî Cizîr û ewja de şarî reyde amebî têhet. Vizêr KCDyî muxatab girewtênê, la ewro bi hawayo ‘banê rêxistine’ nîşan danî. No çîyo ke aqilê merdimî bigîro, nîyo. Yê ke ewro KCDyî înkar kenî, do poşman bibî.”
DÎHABER/AMED