Qezaya Amed Hêne de qayûm tayînê şaredarîye bîyo û heme ziqaqê qeza bi wesayîtanê zirxinan ameyî dagîrkerdiş. Cok ra şar seba ke cewab bido nê kerdişan, paweyê referandûmî yî. Babete ser o hêneyijî qisey kerdî.
Hêzê qesrî berz beno
Yusuf Gulsumo 58 serreyî zî wina va: “Mîyanê nê 18 madeyan de qanûno ke ma temsîl bikero çin o. Nê 18 madeyî tena hêzê Qesrî berz kenî. Cok ra ma do vajî nê. Ma wehşeto ke Sûr, Cizîr, Gever û Nisêbîn de bi ma dayî cuyayîş, vanî nê. Ma sey tirk, kurd, ereb, suryanî û êzidî vanî nê. Cok ra ma vanî Nê, Nê, Nê.”
Ayhan Çîçekî zî veng da kurdan ke biwerzî lingan ser û yewîya xo awan bikerî. Çîçekî herzewbîn hemşerîyanê xo ra waşt ke referandûmî de vajî nê û qiseyanê xo bi nê vatenan qedêna: “Ez tîya ra veng dana Serekkomarî; ti gonîye ra mirdî nêbenî? Ma 45 serrî yo ke seba biratî veng danî, la ê qebul nêkenî. Cok ra ma do vajî Nê, Nê, Nê.”
Seba her kesî ‘Nê’
Faysal Adsiz’î kî vist vîrî ke o do seba ameyoxê domananê xo vajo nê’ û wina domna: “Seba azadî, demokrasî, ziwanê ma û seba kurd û tirkan ez do vaja nê.”
Welatijan ra Mehmet Emîn Kayayî zî va, ma nêşênî dewlete û welatî teslîmê kesêk bikerî û va: “Sîstemo ke wazenî berî, sîstemo ke şaş o. Ez seba ameyoxa ma vana nê.
Ewro ma rê kenî
Fesîh Karataşo ke prosesî nizdî ra taqîp keno, wina va: “Awanbîyayîşê komare ra dima Şêx Seîdî bi hawayo bêbextî ameyî tepiştiş û dima ra ameyî îdamkerdiş. Roja ma ya ewroyêne de zî eynî polîtîkayî domîyenî. Seba vatişê nê xeylê sebebê ma estî. Qanûnêk daxî seba ma çin o. Erdoganî vatbî, eke ma bibî îqtîdar ma do qanûno bingeyîyo ke kurdan bişinasno, bivirazî. Labelê ewro vanî ‘kurd çin î’. Sozê dîyaybî Birêz Ocalanî zî nêameyî tepiştiş. Teşebusê derbe ra dima derbeya raştikêne vera şaredarîye, parlamenter, partî û kurdanê bişerefan de ameye kerdiş. Ma do cok ra vajî nê. Ma bi zazakî vanî ‘nê’, kurmancî ‘na’ û tirkî zî ma do vajî ‘hayir’. Tarîx de ti zulm heta peynî dewam nêkerdo.”
ANF/AMED