Verê cû amebî îdîakerdiş ke hepsîyo bi nameyê Hamza Kaçmaz Zîndanê Tîpa E yê Antalya de bi kendîlê cilan xo aliqnayo. Nika raporê otopsîye yo verên yê Kaçmazî ame aşkerekerdiş û rapor de şopê aliqnayîşî nêvejîya. Goreyê raporê otopsîye, laşê Kaçmazî de şopê derbkerdişî estî.
Babete ser o Datê Kaçmazî Abdulbahrî Kaçmazî qisey kerd û vera îdîayan de hêrsê xo ard ziwan.
Abdulbahrî Kaçmazî va ‘birazayê mi seba ke qanûnê serbestîya kontrolinî îxlal kerdbî, amebî tewqîfkerdiş û 4 aşmî tehlîyeya ci rê mendbîy’ û wina dewam kerd: “Birazayêkê mi yo bîn ma ra va ‘Hamza hetê Ekîbê Rijnayîşî ke gardîyananê zîndanî awan kerdbîy ra ameyo derbkerdiş, ma rewşa ci nêzanî, beno ke merdo zî’. Wexto ke ma şî zindanî ver, ma îdareyê zindanî reyde bi telefon qisey kerd. Ma ra vatî ‘Hamza koguşê xo de rakeweno’. Labelê ma bawer nêkerd, ma nêweşxaneyan gêrayî, netîceyê gêrayîşî de ma dî ke Hamza Nêweşxaneyê Cigêrayîş û Perwerdeyî yê Antalya de beşa cerrahî de rakeweno.”
Gardîyanan keyeyan tehdît kerdî
Kaçmazî dewamê qiseykerdişê xo de dîyar kerd ke birazayê ci hetê gardîyanan ra ameyo qetilkerdiş û wina va: “Gardîyanê ke birazayê mi qetil kenî, personelanê nêweşxaneyî ra vanî xo aliqnayo û wazenî wina qeydê ci bivirazî. Labelê personelê nêweşxaneyî qebul nêkenî. Personelê nêweşxaneyî yew bi yewe mi ra vatî. Goreyê malumatê ke ma girewtî, îdareyê zindanî heme keyeyan tehdît kerdî. Bitaybetî keyeyê merdimê ma Murat Tunçî tehdît kerdî. Ma nika merdimê xo Murat Tunçî ra ti xebere nêgênî. Ewja de bi zorî Muratî ra goreyê xo îfade gênî. Dozger zî wazeno serê hedîseyî bigîro. Dozger ma ra vano ‘Lajê şima întîxar keno, şêrê keyeyê xo’. Labelê ma do peynîya doze veranêdanî. Ganî berpirsîyarî bêrî cezakerdiş.”
Ez do qirika înan veranêda
Kekoyê Kaçmazî Yaser Kaçmazî zî va ‘mi bi xo ci şit û heme laşê ci de sîyatî estbîy’ û wina domna: “Qirika ci de sîyatî yan zî masayîş çinêbî. Milê ci de sîyatîyêko cîddî estbî. Ma do pey nêyî veranêdî.”
Dayîke Kiyafet Kaçmaze zî dîyar kerde ke ez do qirika qatilan veranêda. Dejê mi gird o, labelê ez do veranêda. Ez dejena, ganî ê zî bidejî. Ez wazena ke wa no hedîse bivejîyo raşte û heqê lajê mi erd de nêmano.”
ANTALYA/ANF