Zîndananê Tirkîya û Kurdistanî de zext û tedayî nêqedîyenî. Bitaybetî teşebusê derbe ra dima bi îlanbîyayîşê OHALî nê zext û tedayî resayî dûştêko tewr berz. Zîndanan de hewl dîyeno cilê tek tîpî, nîzamo leşkerî, îşkence û sewbîna dîyeno ferzkerdiş.
Tewr peynî hepsîyê ke Zîndanê Şakran û Kiriklarî yê Îzmîrî de bî, seba ke zext û tedayan qebul nêkerdî û surgunê Zîndanê Tîpa Fyî yê Bolu bîyî. Nê hepsîyê ke surgun bîyî ra ti xebere nîna girewtiş. Keyeyê nê hepsîyan tewr peynî 2 aşmî verê Bolu de şîybî zîyaretê hepsîyan û o wext ra nata hepsîyan ra xebere nîna girewtiş.
Yeno zanayîş ke o wext nizdîyê 26 hepsîyî surgun bîybî û seba ke qedexeyê telefon û pêvînayîşo akerde û padaye esto, merdimê hepsîyan nêşênî înan ra melumat bigîrî. Babete ser o merdimê hepsîyan hesasîyet waştî û dîyar kerdî ke wa herkes na babete de hesas bibo.
Ma nêzanî çi ameyo sereyê înan
Tayê keyeyî dîyar kerdî ke ê nêşenî hepsîyan ra xebere bigîrî û ê nêzanî hepsîyî çi rewşe de yî û wina vatî: “Ma di aşmî yo ke domananê xo ra ti xebere nêgênî. Tewr peynî ma roşan de şîybî pêvînayîş. Seba ke hepsîyî zext û tedayan qebul nêkerdî, ameyî surgunkerdiş. Nika çi pêvînayîşo akerde û padaye û çi zî telefon esto. Ma nêzanî çi rewşe de yî? Ma rewşa domananê xo ra etirîyenî. Wa herkes hesas têbigêro.”
JINNEWS/ BOLU