Ser nameyê hepsîyanê PKK û PAJKî Denîz Kayayî îzehetêko nuştekî da û dîyar kerd ke ê do seba tecrîdo ke Rayberê Şarê Kurdî Abdullah Ocalanî ser o esto, bêro wedarnayene û hepsîyî nêweşî serbest bêrî veradayene, seba 3 rojan dest bi grevê vêşanî bikerî.
Kayayî îzehetê xo de vato ‘ma wayîrê cuyêka bimana yî û no oxir de têkoşînê xo zêdenenî’ û wina domna: “Ma her tewir faşîzmî de xover danî û no het de ma tepîya nêvindenî. Ma vera her tewir kehenperestîye ke vernîya heqîqete û azadîye de asteng a de vindenî. Beno ke ma şerê azadîye de esîr kewtî, labelê ma teslîm nêbîyî. Ma sey hepsîyê PKK û PAJKî vera îttîfaqê faşîstî yê AKP û MHPyî de xover da û ma do xover bidî zî. Senî ke xoverdakarê 14ê Temmuze yê zîndanî serkewtî, ma zî do serbikewî.”
Kayayî dewamê îzehetê xo de wina vato: “Yê ke xo ra vano ez demokrat a, ganî bêvengîya xo xira bikero. Rayberîya ma zîndanê Îmrali de vera tecrîdî de xover dano. Ma hepsîyê PKK û PAJKî zî 10 hezar ra zêde yî û ma do bi Rayberîya xo reyde xover bidî. Reyna bitaybetî hemrayê ma yê nêweşî, seba ke tedawîya înan nîna viraştene, mirenî û no sucê merdimîye yo. Aşmanê peyênan de Nîhat Baymiş, Celal Şeker, Selahattîn Aytek û Koçer Ozdal şehîd kewtî. Ewro rewşa bi seyan embazê ma giran a. Ma do vera kerdişanê faşîzmê AKP û MHPyî de tavîz nêdî û xover bidî. Seba wedarnayîşê tecrîdî, tedawîkerdiş û serbestveradayîşê embazanê ma yê nêweşan, ma do seba 3 rojan bikewî grevê vêşanîye. Ma embazê ke şehîd kewtî bi hawayo rêzdarî vîr anî û ma do girêdayeyê vîrardişanê înan bibî.”
ANF / BRUKSEL