Bi munasebeta Hefteya Heqê Mordeman sûkanê Kurdistan û Tirkîye de bu nûmayişanê ciya cîyayan hayr ancîya îxlalkerdişê heqan ser. Dersim ra heta Amed, Mersîn ra heta Îzmîr, Riha ra heta Stenbol bi hezaran pawitoxê heqê merdiman bi pêşengtîya ÎHD de vejyay meydanan û ardî vîrî ke heta ke meseleya kurd nîro çarekerdiş Tirkîye de meseleyê binlingkerdişê heqan û demokrasî çare nêbenê. DBP û KCD zî bi damûstayîneke hayr ant binlingkerdişê heqan ser.
Ganî zereyê hiqûqî de binamîyo
Derheqê 10-17ê Kanûne Hefteya Heqê Mordeman Baroya Dersim kî kombîyayişê çapemenî viraşt. Serokê Baroya Dersimî Bariş Yildirimî hayr ant binlingkerdişê heqan ê ke Dersim de benê ser. Yildirimî vist vîrî ke Dersim de kî hemşaredar, endamê meclîsa şaredarî ra pîya xêlê kes amey tepiştiş û nîya dewam kerd: “Gune pêrokîn pêvacoyê edlî de zerreyê hiqûqî de bîro mendiş. Gune goreyê heqê mahkemekerdişê adîlane bîro hereketkerdiş, mahkemekerdişê bêtepişnayişî esas bîro girotiş.” Yildirimî hayr ant wezîfe ra dûrvistişê weçîntoxan ser û va, “rexmo ke derheqê înan de qerareko ameyo girotiş çîno zî, karî ra dûrvistişê kesê ke amey weçîntayiş nehiqûqî yo.
Herzewbîn Amed, Riha, Mersîn, Edene, Hatay, Îzmîr û Stenbol de zî bi rayşîyayiş, mitîng, damûstayîn û kombîyayişê çapemenî hayr ancîya Hefteya Heqê Mordeman ser û vajîya ke heta ke meseleya Kurd nîro çarekerdiş herb, rijnayişê gonî û pêrokîn meseleyê Tirkîye çare nêbenê.
DBP: Tabloyeke tarî esto
Navendê Pêroyî yê DBP zî derheqê Hefteya Heqê Mordeman de damûstayîneke weşîna û hayr ant qarneya heqê mordeman yê Tirkîye ser. DBP vist vîrî ke tabyola nikayî yê Tirkîye tabloyeke tarî ya û waşt ke desinde rejîma OHALî wedarîyo, weçîntoxê şarî serbest veradîye, akademîsyen, zanyar, mamoste û memûrê ke wezîfe ra dûramey vistiş peyser wezîfeyê înan bîro dayiş, rojnameger û nuştoxê tepiştî bîrê veradayen.
KCD: Heqê weşî yena îxlalkerdiş
KCD zî bi eynî emelî damûstayîneke da û vist vîrî ke serranê peynî de binlingkerdişê heqan benê berz. KCD hayr ant qetilkerdişê sivîlan, rijnayişê sûkan û goçkerdişê welatijan ser û aşkere kerd ke heqê weşî yê bi se hezaran însanan ameyo îxlalkerdiş. Dûştê hêrişanê hikûmet de KCD hayr ant tekoşîna wertex ser û aşkere kerd ke encex bi nayî faşîzma AKP û Erdoganî werte ra êşkena bîro wedarnayiş.
NAVENDÊ XEBERAN